Џафери открива кога е можно договорот со Грција да се објави во Службен весник
Објавено во: Македонија 21 Јули, 2018
-Политичките партии иницираа да се носат измени на Изборниот законик во делот на методологијата на изборот на ДИК по колективната оставка на претходниот состав а уште кога почнаа колективните оставки, под ваков или под онаков притисок, без оглед од кои причини, укажав на можноста за парализирање на сите институции, вели собранискиот претседател Талат Џафери во денешното интервју за МИА.
Тој посочува дека кога се разговара за определени прашања однапред треба да се предвидат и процедурите во кои чекори и во која временска рамка ќе се реализира таа процедура.
„Политичките партии се договорија да го изменат Изборниот законик и определиле рок во кој тоа ќе го спроведат консензуално и откако се заврши таа процедура почнуваат нови однесувања, нови калкулации во однос на можностите, и фактот што е работата доведена во теснец во однос на роковите, пропишани, кои сами впрочем ги пропишаа партиите“, додава спикерот.
Претседателот на Собранието посочува дека за Парламентот нема последен рок за распишување на референдумот бидејќи се уште нема определно датум за негово одржување.
- Затоа не сме оптеретени стриктно да кажеме 30 јули, 31 јули или 1 август ни е последниот рок. Битно е да се определи рамката во која што се сака да се одржи референдумот и врз база на тоа да се поднесе предлог-одлука до Собранието, вели претседателот на Парламентот додавајќи дека во тој случај би можело да се свика и итна пленарна седница во кој било ден од неделата.
Џафери исто така во интервјуто најавува дека Законот за ратификација на Договорот со Грција и Законот за јазиците ќе бидат испратени во Службен весник пред да го распише референдумот за името. Според Џафери тоа би било логично затоа што, како што вели, што би било предмет на референдумот тогаш.