Ревизија: Фондот за Здравство исплатил 24 милиони евра за неизвршени здравствени услуги

Добивај вести на Viber

Фондот за здравствено осигурување на 43 здравствени установи не им исплатил 7,9 милиони евра иако извршиле здравствени услуги, а на 68 им исплатил 24 милиони евра, повеќе од тоа што реализирале, посочуваат државните ревизори во извештајот за работењето на ФЗО минатата година. „Констатираната состојба ги доведува во независна состојба јавните здравствени установи кои во помал износ ги наплатиле извршените здравствени услуги, а влошена е и нивната ликвидност. Со ревизијата е констатиран тренд на зголемување на бројот на јавни здравствени установи кои имаа помала фактурирана реализација а имаа повеќе добиено пари од Фондот“, се вели во извештајот на Државниот завод за ревизија. Ревизорите констатираат дека Фондот за здравство утврдувал надоместок за здравствени услуги кој не бил во согласност со законските прописи и интерни акти што придонело за нецелосно надоместување на сите трошоци при извршување на здравствените услуги од страна на здравствените установи. Фондот уште од 2009 година немал донесено програма за инвестиции во здравството ниту пак издвојувал пари за таа намена, што според ревизорот било на штета на јавните здравствени установи и директна причина за влошување на условите за лекување на осигурениците. Ревизорот заклучува дека суштинските проблеми во здравството и понатаму остануваат оти Фондот не сака да ја реши судбината на неодржливите здравствени установи а Министерството за здравство не ги исплатило планираните средства за здравствени услуги. За лани Министерството требало да им плати на јавните здравствени установи 9,1 милион евра но на крај на годината истите имале ненаплатени побарувања од 16 милиони евра. Ревизорите констатираат дека одговорноста за ваквото работење е на директорките Маја Парнаџиева, Виолета Петровска и на директорот Џемали Мехази.