Едно во проспектот, друго во реалноста – голем број жалби до туристичките агенции

Добивај вести на Viber

Во екот на летото растат и поплаките кон туристичките агенции. Граѓаните најмногу се жалат на лошото сместување, но и на превозот, посочуваат од Организацијата на потрошувачите на Македонија. Исто така не заостануваат ниту поплаките дека, иако се ветени, многу од работите не се исполнети, а она што стои во проспектот нема врска со тоа што граѓаните го добиваат. Според Маријана Лончар - Велкова, директор на Организација на потрошувачи, голем дел од граѓаните и не си ги знаат своите права, а според процедурата, наместо жалба до пазарената инспекција, во рок од 8 дена тие треба да  достават писмен приговор до туристичката агенција и да побараат да им врати дел од парите ако договорот не е до крај испочитуван. Со цел подобро запознавање со правата, денеска беше презентирана и брошурата за тоа на што треба граѓаните да внимаваат при организирани туристички патувања. Освен проговорот, за подобра заштите се препорачува декогаш да се склучи писмен договор со агенцијата, но и да се чита што точно стои во него. „Брошурата ќе им ги олесни летувањата и патувањата на туристите од Македонија кои се дел од туристичките аранжмани што ги нудат туристичките агенции. Во неа се претставени обврските на туристичките агенции, но и правата и обврските на граѓаните кои патуваат“, појасни и министерот за економија Ваљон Сарачини кој сепак укажа дека голем дел од туристичките агенции ги почитуваат правата и обврските во Законот за туристичка дејност. Сепак, лани до Министерството за економија стигнале 67 претставки од граѓаните за работата на туристичките агенции, а затворени се 11 агенции. „Апелирам до агенциите да ги почитуваат договрите со своите патници и она што го нудат за цената навистина да го реализираат за да не бидат санкционирани. На граѓаните, пак, им препорачувам секогаш да потпишат договор со агенциите, да внимаваат при изборот на аранжмани, да не прифаќаат нерелани понуди и да внимаваат на реномето на агенцијата која ја избираат“, посочи Сарачини. Брошурата е изработена од Министерството за економија и Организацијата на потрошувачите на Македонија (ОПМ) и е двојазична, на македонски и на албански јазик. Таа може да се најде во турситичките агенции, како и на веб-страниците на Министерството за економија, ОПМ  и Стопанската комора за туризам (СКТ). Дел од замките може да видите ТУКА.