Економиите ги наградуваат богатите наместо тешкиот труд на милиони луѓе: 1% од населението има 82% од светското богатство

Добивај вести на Viber

1% од луѓето во светот сочинуваат 82% од светското богатство. Тоа го покажува новиот извештај на британската невладина организација Oxfam International. Информациите доаѓаат еден ден пред почетокот на Светскиот економски форум во Давос, кој ќе се одржи од 23 до 26 јануари.

Додека четири од секои пет заработени долари во 2017 година се сопственост на најбогатите луѓе во светот, истовремено најсиромашниот дел од човештвото не поседува ништо. Исто така еден од главните заклучоци на Oxfam е дека во минатата година е регистриран историски раст на бројот на милијардери и така јазот меѓу богатите и сиромашните станува уште поголем.

„Извештајот на Oxfam оваа година покажува како економиите ги наградуваат богатите наместо тешкиот труд на милиони луѓе. Со други зборови, богатите стануваат побогати, а луѓето на дното остануваат во замката на сиромаштијата“, коментира извршниот директор на организацијата Вини Бијанима.

„Нашите податоци покажуваат дека минатата година 82% од целото богатство во светот била сопственост на 1% од населението. Обратно, 3 милијарди и 700 милиони луѓе немаат ништо, 0% од светскиот раст во 2017 година“, додава таа.

Од 2010 година, богатството на т.н. „Економска елита“ порасна за 13% годишно, а како врвен момент на овој раст е меѓу март 2016 и март 2017 година. Тоа значи дека во просек годишно во светот се појавувале по деветмина нови милијардери. Но нееднаквост има и кај богатите - девет од секои десет милијардери се мажи.