Економијата ќе пресуди дали Шкотска ќе остане во Велика Британија

Добивај вести на Viber

За шкотските гласачи кои наскоро на референдум треба да се изјаснат за независност од Велика Британија, економијата претставува најважно прашање врз основа на кое ќе ја донесат одлуката, покажуваат анкетите. Шкотите на 18-ти септември ќе излезат на референдум за да донесат одлука дали нивната земја ќе ја прекине унијата со Англија стара 307 години и целосно ќе се отцепи од Велика Британија. Анкетата која ја објави агенцијата ТНС покажува дека гласачите во врвот на листата, над сите останати прашања кои влијаат на нивната одлука, ја сместуваат економијата, а потоа и пензиите, социјалната помош, валутата и имиграцијата. Алекс Салмонд, кој ја предводи кампањата за отцепување од Велика Британија, тврди дека на Шкотите ќе им биде многу подобро ако се сами задолжени за сопствените финансии, но инсистира Шкотска да има право на свој дел во британските средства. Тоа подразбра Шкотска да добие можност и натаму да ја употребува фунтата како валута, а Централната банка на Англија да остане кредитор на оваа земја. Меѓутоа, тоа е нешто што британската Влада за сега не е подготвена да го прифати. Салмонд, пак, предупредува дека без удел во британските средства, независна Шкотска би можела да го игнорира својот дел од одговорноста кон Велика Британија и да одбие да го исплати државниот долг од 1,2 трилиони фунти.