Економски раст: Според Хан нула, според ММФ 3, 4 %, според Пешевски највисок во Европа!

Добивај вести на Viber

Со различни проекции за растот и за тоа што политичката криза претставува за економијата деновиве излегоа различни фактори. ММФ ја намали проекцијата на растот од 3, 8 на 3,4  отсто, а Хан во интервју за РСЕ рече дека наместо 4 отсто растот ќе биде нула. Но вицепремиерот Пешевски смета дека економијата ќе расте и ќе биде меѓу највисоките растови во Европа. „И натаму очекуваме македонската економија оваа година да има раст и тоа да биде еден од највисоките во Европа. Проекциите што ние ги имаме и кои кореспондираат со голем број финансиски институции, покажуваат само мала корекција надолу, но ни приближно не може да стане збор за тоа дека нема да имаме раст“, вели Пешевски. Според Пешевски, Хан можеби не располагал со најпрецизни податоци за случувањата. Од друга страна премиерот Груевски истакна дека Заев и СДСМ  прават директна штета на економијата, и дека тоа на некој начин е напишано во извештајот на ММФ. „Нотирано е дека политичката криза веќе влијае на економијата и од тие причини проекцијата на ММФ е намалена од 3,8 на 3,4  за оваа година“ рече Груевски нагласувајќи дека ММФ веќе констатира дека тоа што го прави Зоран Заев и СДСМ влијае на економијата поради што нема да има таков раст како што претходно се очекуваше.