Економско социјалниот совет бара решение за Охис

Добивај вести на Viber

Синдикатот, министрите и работодавачите конечно седнаа на заедничка маса, да побараат решение за работниците од Охис, но одлука се уште нема.  Барањето да се врати стариот закон за пензионирање и да заминат како технолошки вишок до одење во пензија се најде пред економско социјалниот совет. Осумстотина вработени се со 17 неисплатени плати.  Овој сериозен проблем кој ги става на работ на егзистенција, ги натера повторно да излезат на протест пред Владата и министерството за труд и социјала.  Вработените во Охис бараат исплата барем на две плати за да можат и тие со своите семејства да ги минат новогодишните празници додека го чекаат рокот на десеттиот тендер за продажба на фабриката кој истекува до крајот на овој месец. Покрај тоа што се без плата, вработените во Охис не примаат ниту сини картони, без кои не можат да обезбедат ниту здраствена заштита.  Вработените од Охис по неколку месечните протести добија поддршка и од ССМ. - Советот на Сојузот на синдикатите на Македонија заклучи дека ССМ дава безрезервна поддршка на барањата на вработените во ОХИС. ССМ отсекогаш настапува солидарно со барањата на работниците и активно се вклучува во изнаоѓање поволни решенија - соопштија од ССМ. Според условите во последниот десетти  тендер, новиот сопственик на Охис ќе може да ја купи компанијата со намален број на вработени само доколку соодветно ги обесштети и нема да има обврска да го надополни бројот на работници кои спогодбено си заминале. Доколку идниот сопственик на хемискиот загубар ги прифати барањата на вработените во ОХИС, бројот на вработени од 800 ќе биде преполовен.