Добивај вести на Viber
За почеток да не прави ништо, парите да ги стави во банка и да почека година-две да му помине еуфоријата – вака финансиски и инвестициски експерти го советуваат среќниот
хрватски државјанин кој доби неверојатни 17 милиони евра на играта на среќа Евроџекпот.
„Неискусните можат да мислат дека толку пари не можат да се потрошат, но Мајк Тајсон фрли 400 милиони долари и банкротираше. Лесно може да се згреши и да се изгубат парите“, вели за „Јутарњи лист“ хрватскиот инвеститор Хрвоје Прпиќ.
Потоа, тој на среќниот добитник му препорачува да троши најмногу 2-3 проценти од добиената сума. „Јас би вложувал во старт-ап компании, но тоа не значи дека за секого е паметно. Интересни се и инвестициите во земјоделство и во туризам. Но, сепак, парите треба да се вложуваат на различни страни за да се минимизира ризикот“, вели Прпиќ.
Личниот финансиски советник Ивица Брлиќ вели дека има неколку начини за новопечениот милионер да ги „оплоди“ парите. Првиот и наједноставен е тие да се вложат во банка затоа што со таа сума можат да се добијат исклучително добри услови, но постои можност за вложување во осигурителни друштва, инвестициски или пензиски фондови.
„Сите овие можности постојат, но треба точно да ја знаете својата цел. Секако е возможно, без поголем ризик од овие 100 милиони куни да се остварува годишен приход од 10%, или 10 милиони куни годишно“, додава Брлиќ.