Експертот Василка Димитровска: Ова во Старата скопска чаршија требаше да биде најавено

Добивај вести на Viber

Експертот и добар познавач на Старата скопска чаршија, Василка Димитровска, денеска реагира дека прекопувањето на овој културно-историски дел од главниот град се прави со сите потребни дозволи, но дека се создал лош впечаток затоа што сето тоа се прави без најава во доба кога има ограничување на движењето.

„Повеќе луѓе ме прашаа, па проверив што се случува со Старата скопска чаршија. Ова е проект финансиран од Светска банка и имаат уредни дозволи од Управата за заштита на културното наследство и од Конзерваторскиот центар. Знам дека Општина Чаир денес во 13 ч. ќе има прес за ова, па да видиме што ќе кажат. По сета промоција која сум ја направила за чаршијата, се чувствувам некако ептен поразена. Ова требаше да биде најавено, како за граѓаните, така и за медумите“, напиша експертот на својот профил на Фејсбук.

Димитровска е магистер по археологија, директорка на „Хаемус“ - Центар за научно истражување и промоција на културното наследство, менаџер по културно наследство, и професионален туристички водич.

Истовремено градоначалникот на Чаир, Висар Ганиу, на денешната прес-конференција рече дека градежните активности во Старата Скопска Чаршија не се во насока да се измени автентичноста на чаршијата, туку да се замени оштетениот камен травертин со ист таков камен, да се задржи автентичноста и да се создадат подобри услови и за занаетчиите и за туристите.

Тој денеска во изјава за медиумите нагласи дека за реализација на проектот ги имаат добиено сите потребни дозволи од надлежните институции меѓу кои и од Управата за заштита на културното наследство која врши надзор врз целиот процес. Проектот е финансиран од Светска банка со грант во износ од околу 600 илјади евра.

– Целта не е да се направи измена на автентичноста на инфраструктурата на Старата Скопска Чаршија како што се стреми тоа да се прикаже во некои портали кои тенденциозно објавуваат информации без да ја набљудуваат содржината на проектот, рече Ганиу. 

Со реакција се јави и Владата, која соопшти дека со текот на времето настанати се оштетувања на калдрмата на улицата. Оштетувањата се настанати од повеќе фактори: метеоролошки влијанија, моторен сообраќај, недоволен капацитет на каменот и парцијални ископувања на улиците. За таа цел проектот предвидува санација на калдрмата во главната улица (во должина од 200м или вкупно 2240м2). Сите градежни материјали кои се користат за реконструкцијата на излозите на дуќаните и калдрмата во споменичка целина: „Стара Скопска Чаршија“ се автентични и одобрени од стручни лица од НУ Конзерваторски Центар – Скопје и Управата за заштита на културно наследство.