ЕЛЕМ СМИРУВА: Увезената струја нема да влијае врз цената на електричната енергија за домаќинствата

Добивај вести на Viber

Домаќинствата и помалите компании што се на регулираниот пазар за електрична енергија ги добиваат потребните количини енергија и ќе продолжат да ги добиваат соодветно на нивните потреби. 

Во текот на вчерашниот ден целосно е одговорено на потребите на конзумот  преку оптимизација на домашните  производни  капацитети, а поради екстремно ниските температури и зголемената потрошувачка која во текот на денот достигна и повеќе од 30 проценти од вообичаената за овој период од годината, дел од потребите, се набавени од увоз преку јавна и транспарентна постапка, соопштуваат од АД ЕЛЕМ, дополнувајќи дека како одговорна компанија ги ставиле во погон сите расположливи капацитети, а дел од количините преку редовна постапка за набавка на електрична енергија  ги обезбедиле на слободниот пазар.

Техничкиот зафат во термоелектраната „Битола 3“  на кој од саботата наутро интензивно работат стручни екипи на АД ЕЛЕМ и на РЕК Битола, поради  тешките временски  услови во кој се одвива се очекува да заврши во текот на денешниот ден, а после завршувањето на техничко технолошките проби, најдоцна до раните утрински часови и да биде оперативен и вклучен во електроенергетскиот систем. Вработените во АД ЕЛЕМ  и во РЕК Битола последните денови во период на екстремно ниски температури  прават натчовечки напори за целосно одржување на капацитетите во функција.

Стручните тимови на компанијата внимателно ја следат потрошувачката на електрична енергија и го прилагодуваат производството од домашните капацитети во согласност со потребите на тарифните потрошувачи. Доколку анализите покажат дека е потребно надополнување на потребите преку набавка на електрична енергија, постапката ќе биде спроведена во согласност со сите правила и процедури  донесени од  Регулаторната комисија за енергетика. 

Како што информиравме во текот на вчерашниот ден, набавката на електрична енергија  нема да влијае врз цената на електричната енергија за домаќинствата.