Емирот на Катар сака да вложи милијарди долари во Хрватска! Македонија извиси?!

Добивај вести на Viber

Иако  на почетокот на мај годинава Ал Тани и 13 катарски бизнисмени одблизу ја скенираа Македонија, за сега нема ниту една конкретна најава за инвестиција. Неофицијалните информации на Фактор од Qatar Electricity and Water Company се дека оваа државна компанија за сега не е заинтересирана да инвестира во енергетиката во земјава. Катерина Попоска Емирот на Катар, шеикот Хамад Бин Калифа Ал Тани сака да вложи неколку милијарди долари во изградба на терминал за течен природен гас на островот Крка, пишуваат хрватските медиуми. Покрај во енергетиката, Ал Тани се интересира за вложувања во градежништвото, прехрамбената и дрвната индустрија, медицината како и за услуги во информатичко-телекомуникацискиот сектор. Претседателот на Хрватска, Иво Јосиповиќ, следната недела ќе замине за Катар со делегација од 40 бизнисмени. Според најавите во хрватскиот печат, во главниот град на Катар, Доха, Хрватска наскоро ќе отвори и своја амбасада. “Нас ни е важно да донесеме нови вработувања. Сосема е сигурно дека иднината е во енергетиката. Хрватска овде може да даде многу, но и многу да заработи. Секако треба да покажеме мудрост, енергија и треба да имаме визија. Треба да се има Катар за партнер“, изјави Јосиповиќ. Годинава Ал Тани беше во обиколка на Балканот, на Албанија, Бугарија, Полска...Иако  на почетокот на мај годинава Ал Тани и 13 катарски бизнисмени одблизу ја скенираа Македонија, за сега нема ниту една конкретна најава за инвестиција. Отворање бензински пумпи и производни прехранбени фабрики, воспоставување директна авиолинија Доха-Скопје и инвестиции во рударство, туризам, недвижности, земјоделство и во енергетика тогаш најавија директорите, советниците и инженерите од осумте најголеми и најуспешни катарски компании. Претставниците на Qatar Investment Holding и на државната енергетска компанија Qatar Electricity and Water Company тогаш имаа неколкучасовен состанок со поранешниот генерален директор на ЕЛЕМ, Влатко Чингоски, интересирајќи се за докапитализација на ЕЛЕМ, преку влез во проектот Чебрен и Галиште. Од Владата тогаш брифираа дека катарските бизнисмени се интересирале дали и како можат да инвестираат во гасификацијата, во гасните електрани и во термоцентралите, но половина година подоцна нема конкретна инвестиција од Катар во Македонија. Но, неофицијалните информации на Фактор од Qatar Electricity and Water Company се дека оваа компанија за сега не е заинтересирана да инвестира во енергетиката во земјава. Неофицијално, тие од Чингоски се обиделе да дознаат каква е енергетската слика на Албанија, како и можностите за инвестирање во термо и гасни централи во  Албанија, не во Македонија. Катарските бизнисмени пред шест месеци најавија и дека сакаат да произведуваат храна во Македонија и да ја извезуваат во Катар и на трети пазари. Според информации на Фактор, арапските бизнисмени се интересирале и за производство на сточна храна и жив добиток, конкретно говеда и говедско месо, а ја разгледувале и можноста за инвестиции во кланица, каде што би се колел добитокот по Халал стандарди и би се пласирал на арапските пазари. Но, од Владата се уште не се пофалиле дека арапските бизнисмени ќе отворат фабрика или ќе вложат своите милиони во Македонија. Катар е втора најбогата земја во светот! Со БДП по жител од 102.700 долари лани, Катар е втората најбогата земја во светот. Оваа земја минатата година оствари брутодомашен производ од 181,7 милијарди долари според куповната моќ. Дури 79% од економијата отпаѓа на индустријата, а 20,9% на услугите. Минатогодишниот раст на економијата достигна 18,7%. Катар е една од најголемите и најбрзорастечки економии во светот. Нафтата и гасот придонесуваат оваа Арапска полуостровска земјав да стане една од најбогатите во светот. Извозот на Катар минатата година изнесуваше 104,3 милијарди долари, што ја рангира на 37 место во светот. Оваа земја извезува течен природен гас (ТНГ), нафтени производи, вештачки ѓубрива, челик, најмногу во Јапонија, Јужна Кореја, Индија, Сингапур, Велика Британија. Најголемиот увоз во оваа земја доаѓа од САД. Домашните инвестиции во Катар лани изнесуваа 32,3 милијарди долари, а нивните инвестиции во странство 23,54 милијарди долари. Иако е меѓу најбогатите земји со нафта и гас, Катар води економска политика на инвестирање во три приватни фондови, кои се полнат со парите од продадениот гас и нафта. Емирот од Катар поседува свои острови во Нов Зеланд и во Австралија, купува земјишта, бачила, инвестира во енергетика, земјоделство, здравство, образование, туризам.