ЕПЛ ќе ги претстави трите нови модели на „iPhone“ оваа година
Објавено во: Мои пари 26 Март, 2015
Оваа година „Apple“ може да претстави вкупно три нови модели на „iPhone“. Еден од нив може да користи 4-инчен дисплеј, соопштува интернет изданието „Apple Insider“.
Информацијата е на тајванското списание „DigiTimes“, кое се повикува на свои извори во дистрибутивната мрежа.
Според нив двата модели на „iPhone“ ќе се со нов процесор и подобрени спецификации, и ќе се викаат соодветно „iPhone 6S“ и „iPhone 6S Plus“.
Тие ќе ги користат истите димензии на дисплеите како сегашните модели, односно 4.7-инчен и 5.5-инчен екран. Ќе се потпираат и на процесорот A9, кој ќе биде претставен заедно со нив.
Третиот модел ќе го носи името „iPhone 6C“. Тоа е своевидно враќање на палетата „c“, која опстои на кратко со „iPhone 5c“. Овој „iPhone“ ќе ја користи сегашната генерација на процесор A8 наместо новиот. Останува нејасно дали поклопот на смартфоните ќе биде метален или пластичен.
Изворите за весникот тврдат дека и трите нови модели на „iPhone“ ќе имаат „NFC“, сензорот за отпечатоци „Touch ID“ и најновата генерација на платформата „iOS“. Очекувањата се дека „iPhone 6C“ ќе биде претставен како „буџетски“ модел.
Редно е да се напомене дека „Apple“ често порачува делови за своите прототипи од своите дистрибутери, но тоа не значи дека планира да лансира сличен паметен телефон во продажба. Се разбира, компанијата одбива да даде коментар на оваа тема.