ЕСМ бара снабдувач за покривање на загубите на струја што се крадат

Добивај вести на Viber

ЕСМ на крајот од минатата недела го објави огласот за оператор од кого ќе набави струја за технички загуби во електродистрибутивната мрежа, каде што се вклучени и комерцијалните загуби и таканареченото „крадење“ на електрична енергија.

Загубите во електродистрибутивната мрежа на електрична енергија лани ги чинеле граѓаните точно 100 милиони евра. Тоа е практично струја што се губи и краде на разни начини, а ние ја плаќаме преку сметките.

ЕСМ оваа година со енергетската криза се обврза покрај тоа што 100 отсто ќе ги покрие потребите на универзалниот снабдувач за граѓаните и малите потрошувачи и целосно да ги покрие техничките загуби во системот за „ЕВН електродистрибуција“.

ЕСМ сега нуди Рамковен договор за набавка на електрична енергија за загуби на подолг период. Цената ќе биде по пазарни услови. Според тендерот, за најповолен понудувач ќе биде избран оној трговец/снабдувач кој ќе понуди најниска цена по мегаватчас за подолг период на отворен пазар. Понудите требаше да бидат доставени до минатиот петок.

Лани во однос на една година претходно, зголемено беше количеството на загуби за речиси 59.000 мегавати, а згора на тоа, просечната цена за покривање во 2020 била речиси двојно поевтина - само 3.330 денари за мегаватчас. Тогаш сме платиле 47 милиони евра за загуби, а само една година подоцна повеќе од двојно.

Три години по ред процентот на загубите на електрична енергија во мрежата, кои се должат на кражби на струја и неовластено користење, не може да се намали под 13,4 отсто иако редовно се прават планови како оваа појава да се редуцира.

Неовластеното користење на електрична енергија се случува поради различни причини, а истото важи и за загубите. Како најголеми причинители може да се набројат: копањето крипто валути, кражбите на електрична енергија од страна на малите комерцијални објекти коишто имаат голема потрошувачка како и приватната потрошувачка.

Александар Кузмановски