Етингер: Без договор за 5 дена, Грција излегува од еврозоната
Објавено во: Балкан, Економија 26 Јуни, 2015
ЕУ не се стреми да ја „притиска“ Грција, но ако разликите не бидат надминати во наредните 5 дена, таканаречениот „Grexit“ не може да се избегне.
Ова го изјавил еврокомесарот за дигиталната економија и општество Гинтер Етингер.
„Ние ќе сториме се зависно од нас до 30 јуни. Грците покажаа дека се подготвени за реформи“, изјавил Етингер, цитиран од „Ројтерс“. „Grexit“ не е нашата цел, но тоа нема да може да биде избегнато ако не биде пронајден компромис во следните 5 дена“, додал комесарот.
Германската канцеларка Ангела Меркел и францускиот претседател Франсоа Оланд истакнале дека претстојната средба на министрите за финансии од еврозоната за Грција ќе биде одлучувачката последна инстанца за судбината на Грција.
„Ние се согласивме дека треба да продолжиме да работиме (за решение) меѓу Грција и институциите, и дека (собирањето) на еврогрупата во сабота ќе е од клучно значење, бидејќи времето притиска“, изјавила канцеларката по десет часа дискусии со партнерите од ЕУ, собрани на самитот во Брисел. Две дискусии биле посветени на грчката тема, според информации од европски извори.
„Сметам дека оваа средба во саботата е од критично значење, бидејќи сме на критичниот датум“, изјавил од своја страна Оланд.