ЕВН Македонија е загрижена поради поевтинувањето на струјата

Добивај вести на Viber

ЕВН Македонија изрази сериозна загриженост и изненаденост од последната одлука на Регулаторната комисија за енергетика. Од компанијата посочуваат дека тие не побарале зголемување на цената на електричната енергија, но исто така и не очекувале дека ќе има толку големо намалување и тоа токму и само во делот на ЕВН со што директно се загрозува стабилноста на компанијата, но и на енергетскиот сектор во целина. „Големото намалувањето на  цената за дистрибуција и снабдување, во комбинација со истовременото зголемување на цената на производството и преносот кај енергетските компании во државна сопственост, сериозно го загрозува работењето на ЕВН Македонија што значително ќе се одрази на ликвидноста на компанијата.  Само за потсетување, ЕВН Македонија неодамна го промовираше мастерпланот односно најави инвестиции во износ од повеќе од милијарда евра со цел да се обезбеди поголема сигурност и долгорочна стабилност на електро-енергетскиот систем во земјата. За жал, ваквата одлука со сигурност ќе влијае на интензитетот на планираните инвестиции и на соработката со 5.000 бизнис партнери во Македонија.“, стои во соопштението од компанијата. Денеска Регулаторната комисија за енергетика одлучи дека од први јули струјата ќе поевтини за 4,48 отсто.