Европа ја надмина Азија по број на смртни случаи од Ковид-19

Добивај вести на Viber

Во светски рамки, 219,000 луѓе се заразени со вирусот корона, безмалку девет илјади умреле, а 85.000 се излечиле. Во Европа, бројот на починати ја надмина Азија, а најтрагично е во Италија, потоа Шпанија и Франција. 

Вчера беше најтрагичниот дневен биланс во Италија досега - 475 жртви, од кои 319 во Ломбардија, вкупно нешто помалку од 3.000 во таа земја, 35.000 заразени и 4.000 закрепнати. Таков е билансот и покрај карантинот што е во сила веќе две недели и беше воведен од надлежните за да се запре ширењето на вирусот корона.

"И покрај трагичниот биланс во изминатите 24 часа, охрабрувачки е што се опоравија илјада и 800 лица. Ова е важно за нас; бројот на случаи е зголемен за 37 проценти. Имавме постојан, нагорен тренд во текот на целата недела", вели  Анџело Борели, министерот за цивилна заштита.

Безмалку 600 луѓе починале во Шпанија, а 13.000 биле заразени. Во тек е истрага за причината за смртта на 17 пензионери од еден старечки дом во Мадрид, со десетици, наводно, заразени. Во Франција, бројот на заразени лица се зголеми за 16 проценти за само еден ден. Во Велика Британија, бројот на загинатите достигна 104, а од утре нема да работат училиштата. Германската канцеларка Ангела Меркел побара од сонародниците да ги следат строгите мерки за да и помогнат на нацијата да се справи со пандемијата.

"Ситуацијата е сериозна и вие ја сфаќате сериозно. Нема таков предизвик за земјата од крајот на Втората светска војна, затоа што ние толку многу се потпираме на нашата целокупна солидарност. Ве уверувам дека владата прави се што може за да ги ублажи ударите по нашата економија и пред сè работните места за да бидат заштитени. Ќе обезбедиме доволно храна, ги повикувам граѓаните да не складираат, бидејќи ова е манифестација на недостаток на солидарност. Ова е историски предизвик и можеме да го надминеме само заедно ”, рече Меркел.