Фајненшл Тајмс: Цвета економијата во Македонија

Добивај вести на Viber

Сторијата за Македонија како одлична земја за водење бизнис и како 23-то рангирана според последната ранг листа на Дуинг бизнис, се најде во угледниот лондонски весник Фајненшл Тајмс. Весникот го започнува прегледот на македонската економија со изјавата на премиерот Груевски кој се осврнува на податоците од 2006 година, кога Македонија беше на 96 место во светот според годишниот извештај на Светската банка, за веднаш потоа да додаде дека сега Македонија е на 23 место, а зад неа се дури 20 земји членки на ЕУ, како и сите земји во централна и источна Европа, додека  Македонија е дури 12 места пред Словенија, која обично беше прва помеѓу земјите од поранешна Југославија. Како што стои во сторијата, Владата на Груевски од 2006 година се осигури дека земјата ќе има најниски трошоци за водење бизнис во Европа, како и најниски даноци. Според спроведените мерки, се скратија даноците за точно 10 отсто, приходите за социјално осигурување се скратија за 27 отсто, а на компаниите им се обезбеди регистрација за само 4 часа со едношалтерски систем. Во статијата се констатира дека минималните даноци и понатаму се намалуваат доколку инвеститорите се сместат во една од технолошките индустриски зони, а многу од нив веќе се отворени за работа или се во изградба. Исто така се појаснува дека повеќето граѓани се доброобразувани, зборуваат англиски јазик и земаат бруто плата од 430 евра месечно, па оттука коментира весникот, не е ни чудо што толку инвеститори се заинтересирани за Македонија. Груевски особено се гордее со отворањето на фабриките на „Џонсон Контролс“ кои започнаа со работа во 2008 година, а оттогаш отворија и нова фабрика. Оваа година пристигнаа многу инвеститори како „Кромберг и Шуберт“, „Дрекселмаер“ и „Ван Хол“. Овие три проекти со инвестиции од 75 милиони евра, се очекува да вработат над 7.000 луѓе, стои во написот, а се нагласува и тоа дека премиерот е еономист со амбициозни планови за инфраструктурата на Македонија, гради патишта и ја модернизира железницата за земјата да се поврзе со соседните земји како Бугарија и Албанија, со што граѓаните нема да мора да патуваат само преку Солун. Весникот пишува и дека Премиертот сака да привлече инвеститори кои би покриле 49 отсто од ЕЛЕМ во замена за инвестиции за нов капацитет, а Владата, исто така, сака да привлече инвестиции во земјоделството, туризмот и текстилната индустрија, поради што се отвораат текстилни фабрики затоа што постои евтина можност за тоа, како и блискост со Европа и голема флексибилност. Како заклучок на позитивните реформи, весникот го споменува и проектот  „Скопје 2014“, со кој Владата го разубавила главниот град,  а како најистакнат споменик од многуте нови е фонтаната висока 22 метри, изработена од бронза и наречена „Воин на коњ“, се заклучува во статијата на Фајненшл Тајмс.