„Фактор анализа“: Кои се македонски бизнис гиганти што прават над 50 милиони евра во три месеци?

Добивај вести на Viber

Нема изненадувања на листата на најголеми македонски компании. Најпрофитабилни се банките, а најголеми приходи имаат гигантите од областите на трговија со нафтени деривати, производство на лекови, обезбедување телекомуникациски услуги , покажува анализата на „Фактор“ на достапните јавни податоци за компаниите објавени на Македонската берза за хартии од вредност

Најголема македонска компанија според приходите во летниот период убедливо е „Макпетрол“ гигантот за продажба на мало на нафтени деривати. Дополнително „Макпетрол“ остварува значајни приходи и од продажба на стоки за широка потрошувачка на своите над 130 пумпи ширум земјава.

Во сезоната на летни одмори кога граѓаните најмногу патуваат „Макпетрол“ има најмногу работа. Тоа го покажуваат и неговите приходи. За 92 дена во периодот од почеток на јули до крај на септември оваа компанија остварила над 143 милиони евра приходи од продажба од што најголем дел се од малопродажба на своите бензински пумпи. Добивката на „Макпетрол“ за овој квартал изнесува 6 милиони евра и е поголема од збирната добивка за првите шест месеци годинава.

Втора најголема компанија е македонски фрмацевтски гигант, е „Алкалоид“. Неговите резултати континуирано ги охрабруваат актуелните акционери, но и потенцијалните инвеститори во таа акција. За три месеци „Алкалоид“ според консолидираниот биланс остварил продажба од 69 милиони евра. Добивката за овој период од 92 календарски дена изнесува 8,5 милиони евра.

Трета на листата најголеми според приходите на ниво на последен квартал е телекомуникацискиот гигант „Македонски телеком“ чиј приход за три месеци надмина 50 милиони евра, од кои како добивка за компанијата останаа 10,5 милиони евра.

Најголемата челичарница „Макстил“ е на четврто место и тоа е заради снижувањето на глобалните цени на нивните продукти и полупроизводи. Компанијата објави дека исплатила солидарен данок за ланското работење и тоа ја анулираше нивната квартална добивка.

Трите најголеми банки се убедливо и без конкуренција најпрофитабилните услужни компании во македонската економија. Колку е профитабилен тој бизнис само по себе доволно говори следниот факт: нивниот заеднични нето приход од камати и провизии е половина од приходот од продажба на „Макпетрол“. Но нивната заедничка добивка е 63 отсто од приходите. За споредба кај бизнисот на „Макпетрол“ односно трговија на мало и големо добивката е 4 проценти.

Во групата на најголеми компании според приходите се уште две фирми од градежната индустрија. Едната е „Усје“ која произведува градежни материјали односно пред се цемент и усјемал, а другата е најголемата македонска градежна оператива „Гранит“. Кај цементарницата како добивка во овој квартал останале 30 отсто од приходот од продажба. Наспроти неа градежната оперативна има убедливо најмала добивка од сите ранирани компании односно само 2,5 отсто од приходите.