ФАКТОР ИСТРАЖУВА: Автоплац, хотел и учебници билдаат добивки во Кочани

Добивај вести на Viber

Странскиот инвеститор за производство на кабли и еден од најголемите извозници во Македонија, Амфенол Технолоџи, е компанијата со најголема остварена добивка во Кочани за 2023. „Амфенол Технолоџи“ е единствената компанија од овој град која годинава се најде во клубот на 100 најуспешни по остварен профит, иако тоа не значи дека Кочани нема и други успешни фирми, барем кога станува збор по остварениот профит.

На второто место е „Офис Експрес“, фирма за продажба на големо на канцелариски материјали и деловни реквизити. Добивката на компанијата на Наташа Накова е зголемена за 140 отсто. Овој бизнис има 33 вработени но треба да се каже дека под него како подружница припаѓа и автоплацот Ауто Велт за продажба на ексклузивни марки на половни возила.

На трето место е печатницата Европа 92 на некогашниот пратеник и  градоначалник Ратко Димитровски. Оваа година добивката е евидентно повисока од претходниот период. Европа 92, меѓудругото, ги печати и македонските учебници.

Во високата петорка се и Алекс-3 на Марија Јосифова за производство на облека и холандскиот инвеститор Антхура за производство на цвеќе, инаку една од најголемите компании во секторот земјоделство во Македонија по остварен приход.

„Магнолија“ на Александар и Јулија Крстевски се на 6.место. Компанијата е специјализирана за трговија но и го поседува хотелот Ресорт Магнолија на Пониква. Има 52 вработени. По оваа компанија е Миком-98 на Димитар Кузманов. Компанијата регистрирана за „производство на парфеми и други тоалетни препарати“ со 17  вработени направила добивка од 22.500.855 денари од 84.189.190 денари приход. Всушност има неколку бизниси, претежно со тргување преку магацин.

Во последните три од Топ-10 листата се „Калина“ од Оризари за подготовка на градилиште, Гирлофс-Фриготехника за градежно-инсталатерски работи и Еко Оил за тргување со моторни горива. А.К.

Извор: Централен регистар