ФАКТОР НА ДЕНОТ: Денес нема олеснување на мерките, нови 22 заразени со Ковид 19

Добивај вести на Viber

ДЕНЕС НЕМА ОЛЕСНУВАЊЕ НА РЕСТРИКТИВНИТЕ МЕРКИ

Комисијата за заразни болести ниту денеска не донесе одлука за олабавување на мерките за заштита од коронавирусот, односно олеснителни препораки за започнување со работа на одредени дејности, откако денеска беа регистрирани 22 нови случаи на ковид-19 во последните 24 часа.

Според некои неофицијални информации, Владата нема скоро да го ослободи работењето на моловите, обложувалниците и угостителските објекти. Требаше да биде донесена и одлука од денеска да почне и скрининг на населението за откривање на асимптоматските случаи, што го најави министерот за здравство, Венко Филипче.

Комисијата за болести сè уште не разговарала за олеснување на мерките за штедење. Според изворите на Алсат во рамките на комисијата, големиот број заразени лица денес ја натера Комисијата да го одложи олеснувањето на мерките. 

НОВИ 22 ЗАРАЗЕНИ СО КОВИД 19

Денеска Институтот за јавно здравје регистрира 64 оздравени пациенти, информира Министерството за здравство.

Во изминатите 24 часа направени се 145 тестирања, а потврдени се 22 нови случаи на ковид-19 и тоа во: Скопје-13, Прилеп-2 и Тетово-7. Досега во земјата се направени вкупно 19241 тестирања на ковид -19.

НЕ НАСЕДНУВАЈТЕ НА ЛАЖНИ МЕЈЛОВИ

Еден од вашите контакти е Ковид-19 позитивни. Мејл со ваков наслов денеска добиле некои граѓани. На мејлот стои потпис од извесна Јовановска од Министерството за здравство. Иако веднаш наликува дека е лажен, сепак министерот за здравство Венко Филипче објави на твитер дека содржината од овој мејл е невистинита. 

СИНДИКАТОТ НА УПОЗ СЕ НАЛУТИ НА НИНА АНГЕЛОВСКА

Синдикатот на работниците од управата, правосудните органи и здруженијата на граѓани (УПОЗ), остро се спротивставува на личните ставови на Министерката за финансии г-ѓа Нина Ангеловска, а кои се однесуваат за кратење на платата на јавната администрација, кои се нејасни и создаваат забуна во јавноста. Ова го нагласи синдикатот, во своето соопштение до јавноста. 

„Можеби некој требал да ја подучи министерката дека како носител на јавна функција и тоа една од најодговорните во државата, личните ставови да си ги чува за себе. Или пак, тоа не се нејзини лични ставови, туку ставови на одредени лица од бизнис заедницата кои неосновано атакуваат врз администрацијата и упорно ја пласираат идејата дека ако не се скратат платите на администрацијата, на економијата во државата и нема спас“, велат од УПОЗ.

ПРАВЕЛ ОНЛАЈН КОНЦЕРТ, ПО ШТО СОСЕДОТ ГО ПРОБОЛ ВО РАКАТА

Сакал да помогне и да направи хуманитарен онлајн концерт, но бил прободен во раката со нож од сосед кому му пречела музиката. 

Ова му се случило на битолскиот музичар Пеце Петровски, кој има 29 години. Тој викендов, во саботата вечерта, добил убод од нож во пределот на раката, а тоа му го сторил негов сосед, бидејќи му пречела музиката за време на онлајн концертот кој Петровски го пренесувал на социјалните мрежи.

ПОСКАПЕА ГОРИВАТА

Регулаторната комисија за енергетика денеска соопшти дека од ноќеска на полноќ бензините и дизелот поскапуваат за 3,5 денари, соопшти Регулаторната комисија за енергетика.

Новите цени на бензините ќе бидат: 54 денари за „евросупер БС-95“ и 56 денари за „евросупер БС-98“, додека дизелот ќе се продава за 45,5 денари за литар.

ЧИТАЈТЕ УШТЕ

Македонија од 18 март е во вонредна состојба поради епидемијата на коронавирусот, а во меѓувреме бракови се склучуваат во матично при што мора да се почитуваат мерките за заштита.

Порасна јавниот долг на земјава. На крајот на првиот квартал од годинава тој ја надмина психолошката граница од 50 проценти од БДП и достигна 50,7 отсто, говорат најновите податоци за состојбата на долгот што ги објави Министерството за финансии.

„Македонијатурист“ втора година по ред не е најголема хотелиерска компанија според остварен приход. 

Нејзиниот конкурент „Хотел Гранд М“ со само еден хотел две години по ред прави поголем приход од петте хотели на „Македонијатурист“.

Пад на макеоднскиот БДП од пет проценти годинава, намалување на трошоците за живот односно дефлација од еден процент и раст на невработеноста до 21 отсто годинава предвидува Виенскиот институт за меѓународни економски студии. 

Д-р. Љубен Арсенков, субспецијалист по дигестивна хирургија, од јануари е прв човек во Клиниката за хируршки болести Св.Наум Охридски Скопје. Назначен е за в.д. директор на 17. јануари годинава. 

Во изминативе три месеци, кога земјава почна да се справува со пандемијата на корона вирусот, кај народот позната како стара Градска болница, оваа здравствена установа, иако директно не е вклучена во згрижување и третман на пациенти заразени со Ковид-19, успешно се справува со многубројните предизвици.

Бизнисмените барем досега не покажуваат посебен интерес за донирање во солидарниот фонд на Владата преку посебна наменска сметка за помош и поддршка за справување со кризата предизвикана од корона вирусот.