ФАКТОР НА ДЕНОТ: Продолжува вонредната состојба, партиите размислуваат за изборите

Добивај вести на Viber

ВОНРЕДНАТА СОСТОЈБА ПРОДОЛЖУВА УШТЕ 14 ДЕНА

Шефот на државата, Стево Пендаровски по седницата на советот за безбедност изјави дека се продолжува вонредната состојба во траење од 14 дена. 

Вели дека на овој начин Владата со уредби ќе овозможи нормално функционирање. 

„Траењето на вонредната состојба од 14 дена нема ама баш никаква корелација со одржувањето на избори“, рече претседателот. 

Нова вонредна состојба како што објасни е потребна за да се справиме со економските ефекти. 

СДСМ НЕМА ДА ПРАВИ МИТИНЗИ

Социјалдемократскиот сојуз на Македонија донесе одлука да не организира митинзи пред парламентарните избори, за кои инсистира да се одржат до крајот на јуни. Ова денеска го потврди портпаролот Костадин Костадинов, кој рече дека тоа ќе важи за кампањата поради корона-кризата.

Пратеникот, сепак, вели дека не се исклучува можноста за организирање на непосредни мали средби со граѓани согласно мерките за заштита.

„Во делот на тоа како би ја воделе кампањата, како би ги претставувале нашите кандидати секако и програмата, фокус ќе биде ставен на медиумското претставување преку онлајн видео настани и секако имаме различни видови на дигитална комуникација. Единствено нешто на коешто може да сметаме и да размислуваме во периодов е организирање на мали средби, секако согласно протоколите и максимално почитување на препораките на здравствените власти“, рече тој.

ДВАЈЦА ПОЧИНАА ОД КОРОНАВИРУСОТ

Денеска Институтот за јавно здравје регистрира 16 оздравени пациенти, 17 нови случаи и двајва починати пациенти од Ковид-19.

Во изминатите 24 часа направени се 460 тестирања, а потврдени се 17 нови случаи на ковид-19 и тоа во: Скопје-3, Куманово-2, Прилеп-3, Тетово-6, Велес-2, Битола -1. Досега во земјата се направени вкупно 20548 тестирања на ковид-19.

ВЕСЕЛ МЕМЕДИ СВЕДОЧЕШЕ ЗА 27 АПРИЛ

Весел Мемеди, поранешниот потпретседател на Собранието, во своето денешно сведоштво пред Кривичниот суд за организацијата на нападите во законодавниот дом на 27 април 2017 рече дека тогашниот спикер Трајко Вељаноски во моментите на огромна тензија предност му дал на Зеќирија Ибрахими пред да ја пее албанската химна од говорницата, иако пред него за збор се јавиле двајца други пратеници.

„Се сеќавам убаво дека Крсто Мукоски се пријави да говори процедурално и ја пееше македонската химна. Веднаш штом почна да ја пее, видов дека Џеват Адеми и Артан Груби, кои седеа пред мене, се пријавија за збор и видов дека пратеникот Зеќирија Ибрахими, десно од мене, се пријави после нив. Откако Мукоски заврши со химната, претседавачот Трајко Вељаноски му даде збор на Ибрахими, иако другите се пријавија први. Се сеќавам и дека Џеват реагираше зошто му дал збор на Ибрахими кога тој се пријавил прв“, сведочеше Мемеди.

АНГЕЛОВСКА ДАДЕ ДЕТАЛИ ЗА БУЏЕТОТ

Со ребалансот на буџетот Владата годинава ќе потроши околу 53,7 милиони евра повеќе од првичното планираното. Министерството за финансии ги скрои новите проекции во кој расходите се зголемуваат за толку пари или за само 1,4 проценти. Вкупните расходи изнесуваат 3,95 милијарди евра. Приходите се позиционирани на 3,2 милијарди евра или за 11,5 проценти пониски од планот. Со ребаланост се намалуваат минимално трошоците за плати ама поради штедење на некои надоместоци. Платите на јавната админстрација остануваат непроменети.

ЧИТАЈТЕ УШТЕ

Нето дивиденда за домашните физички лица акционери во „Макпетрол“ ќе биде 1.800 денари за акција. „Макпетрол“ годинава додели дивиденда што е за 54 отсто поголема од дивидендата што ја додели лани од добивката за 2018 година. 

Поради пандемијата на коронавирусот, во прашање е доведено одржувањето на четири параглајдерски натпревари во Крушево.

И натаму молк во Владата за тоа дали ќе носи уредба со која би се формирал Фонд за медиуми, за што кабелските оператори веќе имаат неофицијални информации.

Вработените во Центрите за јавно здравје како и сите членови на Итна медицинска помош ќе добијат 20 отсто повисока плата како награда за два месеци, дознава Фактор.

Владата планира да го трансформира Македонско село во старт ап село, дознава Фактор. Ова е дел од долгорочната стратегија на Владата за трансформација на вакви објекти во стартап села.