Филипче: Мал број пациенти на респиратор успешно се излекуваа од Ковид-19

Добивај вести на Viber

За жал, помалку е 10 проценти од вкупниот број на пациенти кои беа поставени на инвазивна вентилација, односно на респиратори, успешно се изборија со болеста, истакна денеска министерот за здравство Венко Филипче, на приемот на норвешката донација од 100 механички респиратори.

-Тоа е една метода којашто се користи како последна за да се спаси животот на пациентите, но во огромен број случаи, тогаш кога пациентите се поставуваат на механичка вентилација, не само кај нас, туку и генерално, не станува збор за пореметување на самото белодробие, туку за жал тромбоза на најситните крвни садови кои го хранат белодробието и затоа таа крајна фаза, за жал, во најголем број завршува со лош исход. Во моментов, на хируршките клиники околу осум пациенти се поставени на механичка вентилација. Се поставуваат и млади пациенти, сега најмладиот има 40 години, а од сите пациенти кои досега беа лекувани, односно ставени на респираторен апарат, најмладиот беше на 23-годишна возраст.

Филипче потенцираше дека најголемиот број на одделенијата имаат централен довод на кислород што практично во голема мера го зголемува квалитетот на лекувањето.

-Од почетокот на кризата со епидемијата, до близу 800 болнички кревети има новопоставен централен довод на кислород и тоа е сосема доволно засега, рече Филипче.