Филипче на состанок со СЗО: Есента критична, ќе има и заразени со Ковид-19 и од сезонски грип

Добивај вести на Viber

Министерот за здравство Венко Филипче, изјави дека на денешниот состанок на Светската здравствена организација, на која присуствувале претставници од повеќе од 150 земји разговарале за следните чекори на владите во однос на справување со пандемијата. Заклучокот е дека и по достигнувањето на пикот на Ковид-19, вирусот и понатаму ќе продолжи да постои и секако ќе има нови случаи на заразени луѓе.

-Нема да можеме целосно да ја елиминираме, за жал, и веројатно ќе треба да има посебни делови на здравствениот систем посветени на пациенти кои ќе бидат КОВИД позитивни и пациенти кои нема да бидат позитивни на овој вирус, а сè со цел да се испланираат капацитетите, посебно гледајќи перспективно во периодот на есента, зимата којашто доаѓа оваа година, кога сите земји ќе се соочат освен со соодветен број на пациенти заразени од КОВИД-19 и со пациенти болни од сезонскиот грип. Треба да се направи една сериозна анализа и поставеност на здравствениот систем, истакна министерот.

Тој рече дека најверојатно ќе бидат многу повеќе активирани матичните лекари, за да се задржат пациентите што повеќе на примарно ниво, а тоа, како што истакна Филипче ќе овозможи да бидат многу повеќе слободни болничките капацитети доколу има потреба од хоспитализација на пациенти заразени со Ковид-19.