Филипче: Знаеме кои сме и на кој јазик говориме, изјавата на Георгиев не е во духот на добрососедството

Добивај вести на Viber

Извештајот кој го изгласа Европскиот парламент не е извештај за постоењето на македонската нација, македонскиот јазик или македонскиот идентитет, рече лидерот на СДСМ, Венко Филипче на прес конференција.

Тој додаде дека никој не може да ги допре или да им наштети на македонскиот јазик и идентитетот.

„Македонскиот јазик и идентитет се јасно дефинирани и заштитени. Никој не може да ги допре или да им наштети. На македонски се преведува во ЕУ, на македонски се потпишуваат договорите меѓу ЕУ и Северна Македонија, на македонски се говори во Унијата. Ова го гарантира Преговарачката рамка“, рече Филипче.

Според него, европските институции веќе ја признаваат македонската реалност и дека ваквите прашања не се предмет на преговарање, туку се веќе решени и обезбедени.

„Ние знаеме кои сме, на кој јазик говориме и токму тоа го загарантиравме со договорите. Македонскиот јазик е безбеден, идентитетот е безбеден. Но македонската интеграција во Унијата е сè подалечна поради политиките и изборите на власта,“ истакна Филипче.

Лидерот на СДСМ ја осуди и изјавата на бугарскиот министер за надворешни работи кој го нарече Мицкоски „северномакедонски“ премиер, истакнувајќи дека такви изјави не се во духот на демократијата и добрососедството.

„Ја осудувам изјавата, затоа што сметам дека не е во духот на демократските вредности, не е во духот на цивилизациските вредности, ако сакате. Не може ниту еден политичар од Бугарија да ги навредува нашите институции. И тоа воопшто не е во духот на добрососедските односи“, рече Филипче.

Потсети дека вакви провокации не се новост и дека македонската дипломатија има искуство и капацитет да се справи со нив.

„Многу пати наназад, во изминатите години и децении од нашата самостојност, сме се сретнувале со такви ситуации – луѓе кои не негирале, луѓе кои не провоцирале – и тоа трае уште од деведесеттите години наваму, и тука до израз доаѓа умешноста на дипломатијата,“ додаде тој.

Филипче посочи дека со истата дипломатија и трпение се избориле и договорите со Грција и Бугарија, во кои биле заштитени македонскиот јазик и идентитет, како и поддршката од Бундестагот во 2023 година.

„Ние со провокации од Бугарија сме се среќавале и порано. Бугарите не се различни од лани до сега. И во наше време, кога ги преговаравме договорите со Грција и со Бугарија, имаше луѓе кои што провоцираа, па успеавме во договорите да стои чист македонски јазик. Значи, умешноста на дипломатијата се гледа тука,“ рече Филипче.