ФК Вардар се нуди на продажба?!

Добивај вести на Viber

Градот Скопје како еден од основачите и мнозински сопственик на акциите во Фудбалскиот клуб Вардар бара инвеститор во управувањето на ова Акционерско друштво, дознава Фактор. Над 1,5 милиони евра годишно во период не помал од 10 години ќе треба да вложи новиот потенцијален инвеститор во Фудбалскиот клуб Вардар АД. Ова го бара Градот Скопје од идниот инвеститор во клубот, дознава Фактор. Како сопственик на 51% од акциите во ФК Вардар, Градот Скопје планира да започне постапка за вклучување на инвеститор во управувањето на ова Акционерско друштво за да обезбеди долготрајна финансиска стабилност и промоција на менаџерскиот и претприемничкиот дух во клубот. Начинот и постапката на влезот на приватен капитал во ФК Вардар АД се уште се непознати. Но, од Градот Скопје велаат дека во зависност од интересот на инвеститорите ќе ја динамизираат постапката. „Минималните вложувања кои ги бараме од потенцијалниот инвеститор се за редовно и тековно функционирање на првиот (професионален) тим кој настапува во Правата Македонска лига, за младинските екипи од сите возрасти како и за администрацијата на Акционерското друштво“, велат од Град Скопје. Според неофицијалните информации на Фактор, од инвеститорот ќе се бара и Предлог-проект за зачувување и унапредување на фудбалскиот бренд Вардар како клуб со традиција, но ќе се бара и стратегија  за унапредување на првиот тим, на младинските екипи и промоција и доближување на фудбалскиот спорт до македонските граѓани. Градот Скопје ќе ги очекува инвеститорите преку Писмата на намери најдоцна до 15 мај годинава да ги наведат сите идеи за реализација на проектот. Кон крајот на јануари минатата година најтрофејниот македонски фудбалски клуб, Вардар, од граѓанско здружение се пререгистрира во Друштво за спортски дејности ФК Вардар АД. Со ова се отвори можност за влез на нови акционери во клубот, а со тоа и за зголемување на буџетот на клубот. Малцински акционер (49%) во ФК Вардар АД  е Акционерското друштво за стопанисување со станбен и деловен простор на Македонија. К.П