ФОКУС НА ДЕНОТ: Mицевски и Филиповска дадоа исказ за „Рекет“, Димовски треба да закаже седница за разрешување на Јанева

Добивај вести на Viber

Сопственикот на градежната компанија „Пелистер“ и еден од најбогатите битолчани, Силјан Мицевски, е повикан по втор пат да даде исказ за случајот „Рекет“ во Јавното обвинителство за организиран криминал кај обвинителката Вилма Рускоска.

Бизнисменот, познат во локалната битолска јавност како Циле, во изјава за медиумите рече дека парите кој му ги изнудил Бојан Јовановски ги уплатил на сметка на „Меѓународен сојуз“, чиј прв човек е Боки 13, а не кај пензионерката Лилјана Тодоровска од Скопје.

Мицевски ги бара назад своите 720 илјади евра, но прво ќе мора да објасни за која намена ги уплатил и под какви околности.

Без коментар за случувањата околу случајот „Рекет“ замина една од најпознатите водителки во земјава Лила Филиповска.

Таа со Бојан Јовановски е блиска пријателка, но пред камерите и новинарите Лила одби да каже и дали во моментот кога Боки13 беше приведен била во автомобилот со кој тој планирал да ја напушти државата.

Косата на Лила и беше поважна од тоа што ја прашаа колегите па дури цинично и им рече „полека ќе ми ја расипете фризурата“.

Верувам дека сите пратеници ќе гласаат „за“ разрешување на Јанева, изјави пратеникот од ДУИ, Артан Груби.

Специјалната јавна обвинителка моментално е во притвор. Таа е осомничена во случајот „Рекет“, по што се поведе постапка за нејзино разрешување. Освен Јанева за овој случај во притвор се и Бојан Јовановски и Зоран Милески.

Собранискиот претседател, Талат Џафери попладнево го достави извештајот на Советот на јавни обвинители за разрешување на Катица Јанева до претседателот на собраниската Комисија за избори и именувања Илија Димовски. 

Сега Димовски треба да закаже седница на која ќе се одлучува за разрешувањето на специјалната јавна обвинителка.

И покрај предупредувачкиот штрајк на наставниците и професорите во училиштата, министерот за економија Крешник Бектеши ја испрати својата ќерка Хана како првачи на својот прв училишен ден во Кичево.

„На сите првачиња кои денеска за прв пат седнуваат во училишните клупи им посакувам успех во учењето и денови исполнети со среќа и задоволство. Воедно на сите ученици им го честитам почетокот на новата учебна година и успешни школски денови во сите наредни години. Нека е со среќа почетокот на новата учебна 2019/2020 година“, објави Бектеши.