ФОКУС НА ДЕНОТ: СЈО доби епитет „измама на векот“, кој ќе може да го види исказот на Кичеец?

Добивај вести на Viber

СЈО е измама на векот, изјави професорот Владимир Милчин синоќа во Само вистина на Канал 5. 

Вели дека правдава изгледа не живее во Македонија и тој не верува дека може да се направи толкава операција како „Рекет“, а да не е замешана политиката.

Милчин исто така истакна дека не го гледа оправдано постоењето на СЈО, затоа што очигледно таму многу работи биле почнати и не биле завршени. 

Зоран Милевски – Кичеец, осомничен во случајот „Рекет“ е тој што ќе одлучи дали неговиот исказ ќе им биде даден на увид на адвокатите на Бојан Јовановски и Катица Јанева, вели неговиот адвокат Александар Новаковски, пренесува „Алсат“ .

Адвокатот Александар Новаковски, кој го застапува Кичеец, објаснува дека насоките како ќе градат одбрана доаѓаат од неговиот клиент. Дополнително, според него, одбраната не мора по секој цена да биде идентична за сите осомничени во „Рекет“. 

Кичеец е во домашен притвор, а Јанева и Јовановски се во притвор во Шутка. 

Двајца пратеници од власта и опозицијата се скараа за тоа дали имало или не амандман за добивање средства за нова опашка за бикот на улица Македонија. 

Пратеничката од ВМРО-ДПМНЕ, Ане Лашкоска поднела амандман на ребалансот на Буџетот за 2019 година со кој бара пренамена на 100.000 денари за бикот кој се наоѓа на улица Македонија, да добие нова опашка, пишува на Фејсбук пратеникот од СДСМ, Костадин Костадинов.

Амандманот кој го објави портпаролот и пратеник на СДСМ, Коста Костадинов со кој пратеничката Ане Лашкоска од ВМРО-ДПМНЕ побарала 100 илјади денари за нова опашка за споменикот – бик, кој е поставен на улица Македонија е непостоечки. 

ЕУ не може да биде легитимација за неправди, вели бугарскиот вицепремиер и лидер на ВМРО-БНД Красимир Каракачанов за БГНЕС. 

„Доколку  Комисијата за историски и образовни прашања нема рок, тогаш ќе нема рок и патот на Северна Македонија кон Европската унија. Неприфатливо е некој да мисли дека тие едноставно ќе ја искористат Бугарија само за влез во Европската Унија“, вели бугарскиот вицепремиер и лидер на ВМРО-БНД Красимир Каракачанов, коментирајќи го неодамнешното интервју на претседателот Стево Пендаровски, пренесува БГНЕС.