(ФОТО) Почна проширувањето на улицата Јордан Мијалков

Добивај вести на Viber

Градоначалникот Коце Трајановски и премиерот Никола Груевски денеска го означија стартот на градежните работи за проширување и реконструкција на улицата Јордан Мијалков (поранешната улица Железничка). Улицата Јордан Мијалков ќе се прошири и ќе се реконструира на потегот од крстосницата со улицата Герман до пред раскрсницата со улицата Павел Шатев. Со овој проект е предвидено улицата да се прошири во должина од 750 метри, а проширувањето ќе се изведува по левата страна, гледано од булеварот Мајка Тереза кон улицата Павел Шатев. По проширувањето, оваа сообраќајница ќе добие три коловозни ленти со ширина од по 3,25 метри, средишна жардиниера со зеленило (1,5 метри), сервисна коловозна лента со паркинг широка 6 метри и тротоар покриен со бекатон-плочки. „Реконструкцијата на улицата Јордан Мијалков ќе се искористи за да се постави нова атмосферска канализација, а ќе се изврши и реконструкција на постојната водоводна и фекална мрежа. На проширување и реконструкција на улицата Јордан Мијалков ќе работат екипите на градежната компанија „Пелагонија“ од Гостивар, а за поставување на осветлувањето ќе биде задолжена фирмата Дигитал ДОО Струмица. Градежните работи на оваа сообраќајница треба да завршат за околу 150 работни дена. Градот Скопје, за градежните работи и за осветлувањето на улицата Јордан Мијалков, ќе вложи околу 47 милиони денари“. вели градоначалникот Трајановски. Градските власти очекуваат дека проширувањето на улицата Јордан Мијалков во голема мера ќе придонесе за растоварување на сообраќајниот метеж од центарот на градот кон Кисела Вода, ќе се скрати времето на патување, а со тоа ќе се намали и загадувањето од сообраќајот во овој дел на градот.