(ФОТО) Само еден коверт со фискални испратил Трајко од Куманово, а доби стан

Добивај вести на Viber

Пензионерот Трајко Кузмановски од Куманово испратил само еден коверт со 20 фискални сметки на наградната игра “Фискална во рака, награда без мака“ и тој му ја донесе највисоката добивка - стан во Скопје, откри министерот за финансии Зоран Ставревски. Тој денеска на Кузмановски му ги врачи клучевите од станот од 52 метри квадратни, сместен во зградата на Јавното станбено претпријатие на „Трета ударна бригада“. „Чичко Трајко од Куманово и неговото семејство се најдобар пример дека среќата ќе си дојде тогаш кога е пишано. Во играта тој учествуваше со едно плико заедно со неговата сопруга, синовите и внуците и си ја доби наградата – вреден стан во централното градско подрачје на Скопје. Ова покажува дека секој што учествува во наградната игра „Фискална во рака награда без мака“ може да биде добитник на вредна награда. Мене ми е посебно задоволство и среќа што гледам дека едно скромно и работничко семејство на човек што цел живот работел занает имаше среќа да го добие станот“, рече Ставрески. Добитникот на станот, Кузмановски, вели дека никој во неговото семејство не верувал оти токму тие некогаш би можеле да бидат добитници на ваква награда. „Не се надевав, не верував дека би можело ние да го добиеме станот. Кога заѕвони телефонот мислев дека некој онака ме бара. Кога чув веќе и кога внуците дојдоа направивме една мала веселба. Сите се радуваме заедно“, рече Кузмановски. Наградната игра продолжува в понеделник, кога ќе биде второто извлекување, а највисоката награда сега е автомобил. Со оваа наградна игра, Владата сака да ја стимулира фискализацијата и да ги охрабри граѓаните да бараат фискални сметки за сите услуги. Фото: МИА