ФРАНЦИЈА ГО ДОБИ НАЈМЛАДИОТ ПРЕМИЕР ВО ИСТОРИЈАТА: Кој е Габриел Атал, полуларниот геј политичар
Објавено во: Свет 09 Јануари, 2024
Тој е еден од најпопуларните политичари во последните
анкети. Атал се стекна со репутација на способен министер со добри јавни настапи.
Тој станува најмладиот премиер во историјата и првиот кој отворено се декларира дека е геј.
Францускиот претседател Емануел Макрон денеска го именуваше 34-годишниот министер за образование Габриел Атал за нов премиер.
Овој потег нема да доведе до големи промени во политиката, но ја сигнализира желбата на Макрон да се обиде да ги надмине непопуларните пензиски и имиграциски реформи од минатата година и да ги подобри шансите на неговата центристичка партија на европските избори во јуни. Анкетите покажуваат дека партијата на Макрон заостанува меѓу осум и десет процентни поени зад партијата на десничарската Марин Ле Пен.
Атал, близок советник на Макрон, кој стана познат низ цела Франција како владин портпарол за време на пандемијата „Ковид-19“, ќе ја замени Елизабет Борн, иако тоа сè уште не е официјално потврдено.
„Габриел Атал е малку како Макрон од 2017 година“, тврди парламентарецот Патрик Вињал, мислејќи на периодот кога Макрон стана најмладиот француски лидер во историјата, тогаш на бран на исклучителна популарност.
Вињал се сретнал со Атал, неговиот сопартиец, пред десет години и посочува дека поранешниот министер за образование е „јасен и има авторитет“.
Францускиот претседател се занимава со потурбулентен парламент откако го загуби апсолутното мнозинство во телото набргу по реизборот во 2022 година. Инаку, Атал и Макрон заедно се помлади од Џо Бајден, кој оваа година повторно се кандидира за претседател на САД.
ФОТО: EPA-EFE/OLIVIER HOSLET