Кој функционер назначен од Владата продаде две компании за соларни паркови?

Добивај вести на Viber

Трајче Ангеловски, генералниот директор на Аеродроми на Република Северна Македонија, акционерско друштво во државна сопственост, продал две неизградени фотонапонски електроцентрали на етаблирани фирми во македонскиот бизнис.

Од овој месец, функционерот од Крива Паланка заедно со својот сограѓанин Иле Пешевски како втор косопственик ги отстапиле уделите од Енерго Солар Систем Доо Куманово.

Превземачи се Хромак и УПМ-Груп кои се најпознатите градежни компании во Куманово, понатаму „ИНТ“-Трејд, најпозната текстилна компанија од Кочани и Централ Инвест, компанија која се занимава со обновливи извори на енергија. Нов управител на Енерго Солар Систем Доо Куманово е познатиот кумановски бизнисмен Бобан Спасовски.

Истиот период Ангеловски, заедно со партнерот Пешевски, го продале Енерго Солар Панел Дооел Крива Паланка на Конструктор Доо, позната градежна компанија од Скопје која е позната по тоа што во изминатите години добива поголеми и помали тендери на централно и локално ниво. Сопственикот на Конструктор Доо, Сашо Ивановски, е нов управител.

- На моjа инициjатива а и во согласност со моjот содружник со коj ги основавме правните лица, постигнавме согласност да ги продадеме и истите имаат нови сопственици на кои им посакувам успех во понатамошната работа.

Би сакал да ве исправам во вашето прашање дека во моментот на купопродажба на уделите, нема изградено фотонапонски централи, туку само земjиште. Во однос на новите сопственици, како и нивните планови со правните лица, не би било етички jас да коментирам, а истите можат да се проверат во тековните состоjби во CРМ, ни одговори Ангеловски.

Тој додава дека двете фирми се уште ја немаат потребната лиценца за производство на електрична енергија.

- Двете правни лица во моментот на купопродажба беа во постапка на урбанизациjа т.е немаше ни одобрение за градба, додава Ангеловски.

Владата во ноември 2020 на Надзорниот одбор  на друштвото за аеродромски услуги му препорача за член на Управниот одбор да го избере Ангеловски, со што практично го назначи за прв човек.

Во последно време странски инвеститори купуваат македонски компании кои веќе имаат купено земјиште со намена изградба на соларни паркови и ги имаат започнато процедурите за добивање дозволи за работа.

А.К.