Добивај вести на Viber
Необезбедено работно место пред да се почне со дупчење - ова според инспекторите е причина за несреќата во пробиштипскиот рудник Добрево. Одговорноста е кај концесионерот „Индо минерали и метали“, кој ќе мора да плати парична казна до 10 илјади евра.
За влакно беше избегната поголема несреќа во рудникот за олово и цинк - двајца рудари беа потешко повредени кога врз главите им се одрона руда. Со искршеници на рацете и ’рбетот беа префрлени на скопските клиники.
Надлежните апелираат да се засилат мерките за заштита при работа во рудниците и да се кренат стандардите, бидејќи инспекциите ќе бидат засилени, а пропусти нема да се толерираат.
Меѓутоа, од надлежниот инспекторат се жалат дека имаат недостиг на инспектори за да можат нормално да ги вршат надлежностите. „Треба 24 часа да имаме инспектор. Во другите земји, на пример во Русија е така. Ни недостигаат уште 99 вработени“, вели Екрем Буњани, директор на Инспекторатот за техничка инспекција.
Министерот за економија Ваљон Сарачини се закани дека доколку биде утврдено дека за несреќата во Добрево е одговорен пропуст во заштитата при работа, концесионерите можат да ја загубат дозволата за рудникот.
Само минатата година 106 рудари биле повредени на работното место, а двајца го загубиле животот.