ГЕРБ ќе се жали во ЕУ затоа што на Андреј Ковачев му е забранет влез во Македонија

Добивај вести на Viber

ГЕРБ ќе алармира во Eвропската Унија (ЕУ) за забраната за влез во земјава на бугарскиот европратеник Андреј Ковачев.

Mакедонската гранична полиција вчера не дозволи влез во земјава на бугарскиот европратеник Андреј Ковачев и четворица други бугарски државјани. Од ГЕРБ објаснуваат дека тие и нивниот претседател Бојко Борисов направиле насочени напори да ја забрзаат европската интеграција на земјите од Западен Балкан, вклучително и на Македонија. 

„На Ѓурѓовден, кога го почитуваме споменот на загинатите војници за нашата татковина, властите на Република Северна Македонија го направија невидениот чин и не му дозволија влез на шефот на групата ГЕРБ-СДС во ЕПП, Андреј Ковачев, кој е и портпарол на групата на ЕПП во Европскиот парламент одговорна за проширувањето на ЕУ и Западен Балкан. ГЕРБ категорично ги осудува овие постапки на властите на РСМ. Ваквите недозволиви мерки, како и сите дејствија во последните месеци против други бугарски државјани или против граѓани на РСМ кои отворено го изјавуваат својот бугарски идентитет, на ниту еден начин не придонесуваат за европската интеграција на Република Северна Македонија, како и за развој на добрососедски односи меѓу двете земји“, се наведува во објавата на Фејбук страната на ГЕРБ.

Од полицијата потврдија дека на петмина бугарски државјани не им е дозволен влез во Македонија, затоа што не ги исполнувале условите во согласност со Законот за странци. Во објаснувањето од полицијата стои дека лица кои ги навредуваат граѓаните и државата немаат право да влезат во земјава.

„Македонската полиција нема да дозволи, ниту сега ниту во иднина, никој да го нарушува јавниот ред и мир и да ги навредува и омаловажува граѓаните и државата и нема да биде дозволен влез на такви лица на територија на државата,“ соопшти МВР.

Настанот на кој требало да учествуваат Ковачев и Врабевски е панихида во Ново Село по повод празникот Ѓурѓовден. Од бугарското МНР вчера соопштија дека одбележувањето со години традиционално се одржува во Струмица од страна на Амбасадата на Република Бугарија во Скопје, Генералниот конзулат на Бугарија во Битола и Фондацијата „Бугарска меморија“. Врабевски е бизнисмен која ја пласира тезата дека во Македонија има 120.000 Бугари. Претходно, на 4 февруари, денот на раѓањето на херојот Гоце Делчев, неколку бугарски државјани навредуваа полицајци на граничниот премин Деве Баир, поради што добија забрана за влез за период од 3 години и парични казни. Ковачев и европратеникот Ангел Џамбаски долго време упатуваат провокации кон Македонија.