Го „олади“ ли Ахмети Мицкоски за идно коалицирање
Објавено во: Македонија 21 Декември, 2019
Без почитување на договорите со Грција и со Бугарија и на Рамковниот договор, односно Законот за јазици, никој да не се надева дека ќе му бидеме партнер во Владата. Ова беше пораката која најгромогласно одекна од четвртиот Конгрес на ДУИ. Тоа всушност значи дека без овие три услови, никој не требада очекува евентуална коалиција со ДУИ за идна влада.
Со оглед што СДСМ ги прифаќа овие услови, речиси е извесно дека оваа порака е упатена до ВМРО-ДПМНЕ, и нејзиниот лидер Христијан Мицкоски.
Тој, пак, денеска на партиски собир „Обновата доаѓа“, рече дека Заев ќе биде премиер уште 13 дена, а на изборите ќе победи ВМРО-ДПМНЕ. Од партијата постојано нагласуваат дека според анкетите, тие ќе имаат водство на изборите.
Дали Ахмети сега им порачува дека ќе мора да ги омекнат ставовите, доколку сакаат неговата партија да им биде иден коалиционен партнер.
А, потпретседателот на ВМРО-ДПМНЕ, Александар Николоски, при вчерашно гостување во емисијата „360 Степени“ на ТВ Алсат, не се помести од познатите ставови на партијата против Договорот од Преспа, против Договорот со Бугарија и законот за јазици во формата во која е усвоен.
Тоа значи дека ВМРО-ДПМНЕ нема да ги прифати условите на ДУИ.
„Има два начина да се направи тоа: првиот е да освоиме двотретинско мнозинство за да можеме да пристапиме кон промена на Уставот и да го вратиме старото име. Доколку граѓаните не ни дадат толкава поддршка, треба да направиме брза серија на реформи, да ја ставиме Македонија на брза лента, да се обидеме во скоро време да станеме членка на Европската Унија и кога ќе сме на иста маса со Грција, да пробаме да ги менуваме работите“, рече Николоски.