Град Скопје: Со лажење и крадење на туѓи проекти не се прави рејтинг

Добивај вести на Viber

Вистинска срамота е кога функционер избран на непосредни избори од граѓаните, а во случајов од сопствените соседи, наместо реални проекти кои произлегуваат од сопствената програма, се кити со туѓи перја и лаже дека реализира свој, кога впрочем станува збор за туѓ проект.

Ова го пишува во соопштението испратено од канцелариите на град Скопје, од каде потенцираат дека улицата „Радишанска“ е проект кој во целост се реализира од градот Скопје - од проектирање, преку финансирање, до реализација. 

- Општина Бутел, а уште помалку градоначалникот на општина Бутел Дарко Костовски има било каков придонес во овој проект. Срамно е ваквото лажење на сопствените граѓани и соседи кои својата доверба ја дале на човек кој не е способен да реализира свои проекти, па мора да лаже дека реализира ветување за проект во кој тој нема никаква допирна точка.

Улицата „Радишанска“ е градска улица, што дополнително ја прави објавата на Костовски манипулативна, особено бидејќи покажува колку тој не ја познава својата работа и ингеренции. Оваа улица  е дел од проектот „Скопје без заборавени населби“ од програмата „За Модерно Скопје“.

Градот Скопје во континуитет ги реализира проектите од програмата избрана од граѓаните, која содржи клучни барања за подобрување на градската инфраструктура - се наведува во нивното соопштение.

Од таму додаваат дека „со исполнување на ветувањето за целосна реконструкција на една од најважните сообраќајници под надлежност на Град Скопје во општината Бутел, улицата „Радишанска“ се обновува во должина од 1.100 метри“. 

Се потенцира дека се реконструира коловоз на улицата на површина од 7.363 м2, рабниците и тротоарите, а воедно ќе има и партерно уредување и реконструкција на последната автобуска постојка на линијата број 57.

Фото: Принтскрин/Фејсбук/Град Скопје