Добивај вести на Viber
Во Организацијата за заштита на потрошувачите денеска врие. Граѓаните кои имаат исклучено парно масовно доаѓаат со сметките покажувајќи ги нелогичните суми. За половина месец, со иста квадратура на стан, на двајца граѓани им дошле различни сметки. Едниот треба да плати 500 денари а другиот 700 денари.
„Луѓето не знаат како воопшто се пресметува тој паушал, од Топлификација велеа дека тој ќе изнесува 10 денари од метар квадратен, сега излезе дека нема никакво правило, и дека како што тврдат граѓаните ако си пријател со некој од Топлификација не мора ни да плаќаш“, вели Маријана Лончар од Организацијата на потрошувачи.
И додека граѓаните револтирано велат дека нема да ги плаќаат сметките за исклучено парно, во Организацијата за заштита на потрошувачите сепак ги советуваат да платат. Лончар објаснува дека сега собираат информации од граѓаните по што ќе поднесат претставка до Уставен суд за Правилникот.
„Ние не можеме да кажеме не плаќајте сметки зашто тоа е нешто донесено со закон и ако падне на Уставен они ќе си ги добијат парите назад“, вели Лончар.
Според неа, за случајот со Топлификација треба да се произнесат и од Комисијата за заштита на конкуренцијата затоа што било очигледно дека со високите паушали, Топлификација ја користи својата монополска позиција на пазарот.
Од топланите пак објаснуваат дека тие никогаш не кажале дека граѓаните треба да плаќаат фиксна цена од 10 денари за метар квадратен и дека пресметката се правела во зависност од односот на исклучените корисници и потрошувачката на енергија во зградата. Инаку во Скопје близу 11.000 станови се откажани од парно греење и сите тие треба да плаќаат паушал затоа што цевките на Топлификација поминуваат низ нивните станови.
За ваквата одредба пред неколку години, беше поднесена иницијатива до Уставниот суд за нејзино укинување, но судот отфрлил дел од претставките затоа што тој Правилник веќе не постоел.