Граѓаните преку апликација ќе се информираат за загаденоста на животната средина

Добивај вести на Viber

Граѓаните до крајот на октомври преку апликација ќе може да се информираат за состојбата со животната средина, загаденоста на водата, воздухот и почвата за секоја парцела во Скопскиот регион.

Апликацијата освои прва награда на натпреварот за идеи што на 5 март се одржа во Драч, Албанија во конкуренција на 10 предлози од седум земји од регионот учеснички во проектот „Инспирација“ подржан од Европската комисија.

Првонаградениот проект доби 20.000 евра од Европската комисија за изработка на софтверска апликација и обезбеди право на учество на натпревар за идеји во Фиренца, а е заеднички проект на Министерството за животна средина и просторно планирање и Агенцијата за катастар на недвижности на тема „Да ја заштитиме животната средина“.

Директорот на Агенцијата за катастар на недвижности Славче Трпески денеска на прес-конференција појасни дека апликацијата ќе овозможи на едно место увид на просторните податоци преку геопорталот на Агенцијата.

„Агенцијата ќе ги даде своите податоци за катастарските парцели и за топографските карти и други податоци со кои што располага, а МЖСПП ќе ги даде податоците за заштитата на животната средина, почвата, водата, флората, фауната. Ќе се добие една апликација на која ќе можат граѓаните да ги видат заштитените подрачја и каква е загаденоста на воздухот на почвата“, рече Трпески.

Според државниот секретар во МЖСПП Соња Лепиткова, секој што поседува имот ќе може точно да знае каква е состојбата со животната средина, со воздухот, почвата и водите и ќе знае точно колку неговиот имот вреди и дали постои нешто го загадува. За оние што сакаат да купат имот на мапата ќе може да види каква е состојбата со животната средина и ќе знае каков квалитет на земјиште може да купи.

„Тоа во иднина ќе значи формирање на населби кои не сме ги знаеле и кои воопшто не биле третирани од урбанистите за живеење во здрава и квалитетна животна средина. Сега ќе бидат мапирани и евидентирани состојбите и катастрите на загадувачи на воздух, почва, вода и со отпадот и секој граѓанин јасно на мапата ќе може да види која било катастарска парцела во каква состојба во полето на животната средина се наоѓа“, истакна Лепиткова.

Пилот апликацијата ќе се реализира на територија на Скопскиот регион, вклучувајќи ги 17-те општини, Аеродром, Арачиново, Ѓорче Петров, Гази Баба, Зелениково, Илинден, Карпош, Кисела Вода, Петровец, Бутел, Сарај, Студеничани, Центар, Чаир, Чучер Сандево, Сопиште и Шуто Оризари.