28 Март, 2024
0.1218

Граѓаните се задолжуваат за да го истераат месецот

Објавено во: Анализа 09 Декември, 2012

Добивај вести на Viber

Во услови кога животниот стандард на граѓаните го допре дното поради се почестите поскапувања на основните производи, Македонците масовно се задолжуваат за да го истераат месецот. Вкупната задолженост на граѓаните изнесува 1,4 милијарди евра, а речиси половина милијарда евра од кредитите се потрошувачки Соња Јованова Наумовска Македонските семејства се презадолжени. Близу 1,4 милијарди евра изнесува долгот на домаќинствата кон банките, а според статистичките податоци, ваквиот износ е повеќе од два пати зголемен од 2006 година кога задолженоста на граѓаните изнесувала 504 милиони евра. Статистиката покажува дека граѓаните најмногу се задолжуваат со долгорочни и потрошувачки кредити. Лани,  дури 840 милиони евра биле земени кредити со долг рок на враќање. Според податоците на Народната банка од годинава пак, заклучно со октомври кредитната изложеност по основ на потрошувачките, најатрактивни кредити надмина половина милијарда евра. Ако на задолженоста се додадат и минусите на тековните сметки кои надминуваат 70 милиони евра тогаш произлегува дека повеќе од половина од вкупната задолженост на граѓаните се должи на заеми за основна егзистенција. Задолженоста на домаќинствата (во илјади евра) Се потешко се враќаат кредитите Нефункционалните кредити на банките растат со брзо темпо во последните години. Само оние на домаќинствата лани изнесувале близу 100 милиони евра, а во 2006 година биле 26 милиони евра, што значи дека за шест години пораснале за неверојатни 74 милиони евра. Загрижувачки е податокот дека расте бројот на кредити кои банките не можат да ги наплатат од домаќинствата, за разлика од порано кога најмногу заглавуваа компаниите. Според едно истражување на Заводот за статистика кое ја мери сиромаштијата во земјава, дури 40% од населението има проблеми со исплата на станбени и потрошувачки кредити и плаќање на сметки. Состојбата не е поразлична и во соседството. Во Бугарија, плаќањето на сметки е најчестата причина поради која Бугарите земаат кредити. Во периодот јули – септември, секој трет брз кредит бил кредит за покривање на сметките. Во Србија, фирмите се попроблематични должници, но не се исклучуваат и граѓаните кои најчесто заглавуваат со станбените кредити. Таму банките веќе активирале околу 300 хипотеки на граѓани кои се задолжиле за да купат стан. Во Хрватска пак, од 127,6 милијарди куни одобрени кредити на граѓаните, спорни за враќање се 11,2 милијарди куни. Банкарите пак, на тркалезна маса во рамките на Финекспо порачаа дека кредити ќе продолжуваат да одобруваат и понатаму, со можност и за намалување на каматните стапки.        

Можеби ќе ве интересира

ДОЈДЕ ПРОЛЕТТА, НО ЗИМА НЕМАШЕ - ДАЛИ Е ОВА НОВОТО НОРМАЛНО И ШТО НЕ ОЧЕКУВА ОВА ЛЕТО? Еве што велат метеоролозите од Балканот

ДОЈДЕ ПРОЛЕТТА, НО ЗИМА НЕМАШЕ - ДАЛИ Е ОВА НОВОТО НОРМАЛНО И ШТО НЕ ОЧЕКУВА ОВА ЛЕТО? Еве што велат метеоролозите од Балканот