Граѓаните најмногу трошат за храна и сметки – дали се штеди за здравјето?

Добивај вести на Viber

Ако ја погледнеме структурата на минималната потрошувачка кошничка, граѓаните најголем дел од парите ги трошат за храна и плаќање сметки.

Граѓаните најмалку одвојуваат за здравјето. Бројките покажуваат дека луѓето повеќе пари даваат за култура, а помалку за здравјето. Минималната потрошувачка кошничка како што објави Сојузот на синдикатите на Македонија (ССМ)  во ноември изнесувала 51.714 денари, од кои за храна во ноември биле потребни минимум 19.518 денари, а за режиски трошоци 12.983 денари. Понатаму, 3.668 денари се минимум потребни за превоз, 2.986 денари за хигиена и 2.250 денари за облека или обувки. За културни активности, според синдикалната минимална кошничка, остануваат 1.067 денари, а за здравствени услуги само 799 денари.

Лидија Чолакова-Дервишова, претседателка на Здружението на приватни лекари  вели дека свеста кај граѓаните е променета за разлика од порано и сега многу повеќе внимание обрнуваат на здравјето.

„Ние вложуваме многу напори, да се прават превентивни прегледи за откривање на дијабетес, бубрежни болести, кардиоваскуларни болести. Мажите постари од 45 години ги упатуваме да направат тумор маркери на простата, а жените ги советуваме редовно да одат на гинеколог. За разлика од порано кога жените кажуваа дека со години не отишле на гинеколог откако родиле дете, сега е мал бројот на жени кои барем еднаш годишно не одат на гинеколог. Пензионерите кога ќе земат пензија, прво купуваат лекови, а некои од нив фондот ги покрива, дел ги купуваат приватно. Голем дел од населението редовно прима некаква терапија за хронични болести“, вели Чолакова Дервишова.

Што се однесува до минималните месечни трошоци на едно четиричлено семејство, тие во ноември се за 200 денари зголемени во однос на октомври, а за 1.490 денари во споредба со септември. Со години граѓаните најмногу пари одвојуваат за храна и сметки. 

Сања Атанасовска

foto freepik.com/ijeab