Грците предвидуваат продлабочување на кризата во Македонија

Добивај вести на Viber

Соседите изгледа во полна пареа ја следат состојбата во Македонија.

Тоа го говори фактот што едно грчко радио анализирајќи ги изборните резултати пренесува дека изборите ја продлабочуваат политичката нестабилност.

Проблемите, според анализата, ја преминуваат границата на само внатрешно-политичките и може да се одразат и на етничките и на општествените односи во земјата. Коментирајќи ги етничките односи, анализата забележува дека е импресивен резултатот од изборите на новото албанско движење Беса.

Она што Грција очекува, како што пренесува агенцијата мета, да го види е како следната влада ќе се постави кон грчко-македонските односи. 

Според анализата на „Атина 98.4“, интересно е дека и двете големи партии, ВМРО-ДПМНЕ и СДСМ по однос на прашањето за името имаат слични позиции и ветуваат дека нема да направат отстапка од теми како македонскиот идентитет и јазик, како и дека секое договорено решение ќе оди на референдум.

„Ова е негативен развој, бидејќи го поткопува преговарачкиот процес во рамки на Обединетите нации. Иредентизмот на националистичкиот лидер на Албанија, Еди Рама се вкрстува со иредентимот на политичките партии во Скопје и во комбинација соработката меѓу Тирана, Скопје и Анкара создава еден силен бран на ревизионизам и на нашата северна граница“,се вели во анализата.

Спорот за името, според текстот, се состои од поттикнување иредентистички и територијални претензии од македонска страна кон Грција преку фалсификување на националното, историското и културното наследство на Грција.

„Грција останува стабилна на политиката за компромис и се стреми за изнаоѓање одржлив договор за спорот за името. Грчката влада има јасна позиција за ова, а тоа е сложено име со географска одредница пред зборот Македонија, кое ќе важи кон сите ерга омнес за севкупна употреба, внатрешна и меѓународна“, се вели во текстот од анализата.