Грција е во внатрешен банкрот?
Објавено во: Економија 27 Мај, 2015
Грција должи над 5 милијарди евра на приватните компании, а исто така веќе ја забавува исплата на пензиите и платите.
Грција е во состојба на внатрешен банкрот, тврди новинарот Јоргос Папус, цитиран од сајтот „Грик репортер“.
Доказите за ова се многу, но најчесто е тоа дека државата престана да и плаќа на добавувачите.
Според Папус доказ број еден за внатрешниот банкрот на земјата е дека грчките даночни обврзници продолжуваат да создаваат нови обврски. Само во април требало да бидат платени даноци во висина од 737 милиони евра, но се поднесени многу мал дел од нив. Вкупната вредност на старите и новите обврски кон даночните служби е над 77 милијарди евра.
Уште во почетокот на месецот компаниите од различни сектори на економијата предупредија дека државата не им плаќа на снабдување. Во март грчката држава не им исплатила обврски кон добавувачи во износ од 418 милиони евра. По запирањето на плаќањата во април вкупните обврски на државата кон грчки приватни компании надминуваат 5 милијарди евра.
Се одлагаат и исплатите на пензии и плати во државните институции. Иако платите на лекарите се исплаќаат редовно, болниците не добиле пари со месеци.
Депозитите во грчките банки исто така продолжуваат да истекуваат, така што во првите четири месеци од 2015 година од грчките банки биле повлечени скоро 28 милијарди евра.
Вчера шефот на Европскиот стабилизационен механизам Клаус Реглинг предупреди дека без договор со кредиторите Грција нема да добие нови заеми и за две недели има опасност да западне во неликвидност.
„Грција е блиску до договор или до банкрот“, пишува во својот наслов и изданието „Бизнис инсајдер“, според кое банкротот е се повеќе веројатен.
Вчера еврото забележа пад на девизниот пазар поради загриженост дека Атина нема да може да го исплати долгот кон ММФ на 5 јуни.