Грција очекува стотици милиони евра годишно од „Турски ток“ по 2019-та

Добивај вести на Viber

Грција очекува да добие „значителни финансиски дивиденди“ од стотици милиони евра годишно со проектот за гасоводот „Турски ток“, кој е предвидено да испорачува природен гас од Русија по 2019 година, изјави грчкиот министер за енергетика.

„Гасоводот ќе донесе исклучително важни добивки за Грција, на прво место, поевтин гас и други приходи кои можат да се во износ од стотици милиони евра годишно“, истакнал министерот за енергија, Панајотис Лафазанис.

Лафазанис истакнал дека Атина очекува да добие значителни финансиски дивиденди од газопроводот по 2019 година, кога Русија ќе престане да испорачува гас за Европа преку Украина.

Потсетуваме дека во средата рускиот претседател Владимир Путин изјави дека „Турски ток“ може да стане еден од клучните енергетски дистрибутивни центри на Грција во Европа. Според Путин, Атина може да заработи стотици милиони евра годишно од транзитот на гасот, ако се приклучи на проектот за гасоводот „Турски ток“.

Изградбата на гасоводот ќе биде спроведена од приватни компании од Русија, Грција и Европа и може да вклучува учество на грчката влада, истакнал Лафазанис.

Во декември 2014 година Москва најави укинување на изградбата на гасоводот „Јужен ток“, кој требаше да преминува преку Црното Море, за да испорачува руски гас преку Бугарија, Србија, Унгарија и Словенија до Италија и Австрија.

„Турски ток“ ќе го замени „Јужен ток“, и ќе има годишен капацитет сличен на него - околу 63 милијарди кубни метри квадратни. Новиот гасовод ќе поминува под Црното Море и ќе излегува на турската територија, со што на турско-грчката граница е предвиден центар за понатамошна дистрибуција на гасот кон потрошувачите во Јужна Европа.