Груевски ќе ги прими лекарите на разговор, но нема да ја менува платата по учинок

Добивај вести на Viber

Премиерот ќе разговара со лекарите, но нема намера да го менува моделот за плата по учинок. Тој смета дека моделот е добар, а лекарите кои штрајкуваат според него биле политички мотивирани. „Може да штрајкуваат со месеци, со години, ние не им го оспоруваме тоа право. Ама мора да најдеме начин да се справиме со уцените кои се почесто ги слушаме од одредени поединци“, вели Премиерот Никола Груевски. Според него проектот за плаќање по учинок треба да им помогне на лекарите кои посветено и одговорно ја вршат својата работа, а да ги охрабри оние кои работат непрофесионално да биле по посветени на својата работа. „Мислам дека пректот доби подршка и од голем број лекари, но дел од нив само дел, очигледно политички мотивирани пред изборите, го користат проектот за дисквалификација на реформите во здравството заборавајќи дека токму оваа влада вложи најмногу во здравството“, изјави Груевски. Од Самостојниот синдикат на клинички центри повеќепати ги отфрлуваа обвинувањата дека се политички мотивирани. Тие уште еднаш појаснија дека не се работи за мала група лекари туку зад штрајкот стојат повеќе од 1400 лекари од целата земја, независно од нивната политичка определба или националност. Според нив, вчерашниот контрапротест бил резултат на партиски притисоци, а заедничкото за сите 90 луѓе собрани вчера пред Министерството за здравство била партиската книшка во ВМРО-ДПМНЕ, пишуваат во денешното соопштение. Штрајкот на лекарите трае 25 дена. Вчера за првпат имаше и контрапротести, кога за време на нивниот протестот пред Владата со кој лекарите специјалисти побараа корекција на платите и укинување на платата по учинок, друга група протестираше пред вратите на министерството за здравство со спротивно барање да не се менува новиот модел за исплата на докторските плати во јавното здравство.