Грузија го замрзна зачленувањето во ЕУ

Добивај вести на Viber

Грузиската владејачка партија денес објави дека земјата ќе ги прекине преговорите со Европската унија до 2028 година и ќе го отфрли европското финансирање, со што практично ќе ја стопира својата кандидатура за членство.

Во соопштението, владејачката партија Грузиски сон ја обвини ЕУ за „тирада на навреди“, за користење на пристапните преговори за „уцена“ и „организирање револуција во земјата“.

„Одлучивме да не го ставаме на дневен ред прашањето за отворање преговори со ЕУ до крајот на 2028 година. Исто така, одбиваме какви било буџетски средства од ЕУ до крајот на 2028 година“.

Јужнокавкаската земја со население од 3,7 милиони го запиша пристапот во ЕУ во својот Устав и традиционално е најпрозападна од сите поранешни советски републики.

Грузиските односи со Брисел нагло се влошија во последните месеци. ЕУ претходно објави дека барањето за членство на Грузија е замрзнато.

Анкетите покажуваат дека околу 80 отсто од Грузијците го поддржуваат членството во ЕУ и знамето на ЕУ се вее заедно со грузиското национално знаме на сите владини згради.

Грузискиот сон уверува дека еден ден сака да влезе во ЕУ, но во последниве години постојано се занимава со дипломатски спорови со Брисел и ги продлабочува односите со соседна Русија.

Претходно во четвртокот, грузискиот премиер Иракли Кобахиџе им рече на новинарите дека членството во ЕУ може да и наштети на економијата на Грузија, бидејќи Тбилиси ќе мора да ги откаже визните договори и трговските договори со други земји.

ЕУ ѝ додели на Грузија кандидатски статус во декември 2023 година, но критикуваше одредени закони што ги турка Грузискиот сон оттогаш, вклучувајќи ги законите за „странски агенти“ и правата на ЛГБТ, како авторитарни, инспирирани од Русија и како бариера за членство.

Западните земји оценија и дека изборите во октомври, на кои блокот Грузиски сон освои речиси 54 отсто од гласовите, се полни со нерегуларности. Опозициските партии рекоа дека изборите биле наместени и одбија да ги заземат своите места во парламентот.