Добивај вести на Viber
Продолжување на позитивниот тренд во македонската економија со раст од 3,7% за годинава, очекува гувернерот на Народна банка Димитар Богов.
„Веќе следниот месец започнуваме со нова рунда на проценки да видиме каде и за колку имаме отстапки од претпоставките и можеби ќе има и ревизија на оваа бројка. Кај инфлацијата проценивме дека таа ќе изнесува 2,3 отсто на годишно ниво и со априлската редовна ревизија ќе направиме проценка и на оваа бројка“, изјави Богов, кој за предизвиците на македонската економија говореше пред студентите на Универзитетот на Југоисточна Европа, но и пред нивните професори и гости-бизнисмени.
Меѓународните случувања, а посебно кризата во Украина и односите помеѓу Русија и западните сојузници можат да влијаат врз македонската економија, која е мала и отворена, смета Богов.
„Доколку дојде до ескалација на состојбите и меѓусебни трговски ембарга помеѓу Русија и Западот можен е пораст и на цената на нафтата и оценувањата за пораст на економијата во ЕУ од 1 отсто да бидат намалени што секако ќе има одраз и на нашиот извоз кој главно оди во земјите на ЕУ“, појасни гувернерот.