ХАРИ КОСТОВ: Со тоа што УБК ми ги слушала разговорите со другите директори на банката, штета претрпеле фирмите што барале гаранции

Добивај вести на Viber

Хари Костов, извршен директор на Комерцијална Банка обелодени какви штети е можно да претрпеле компаниите со кои соработувала банката, додека тајната полиција му ги слушала разговорите.

Ова тој го кажа денеска во сведочењето во основниот предмет на СЈО „Тврдина-Таргет“ за масовното незаконско прислушување од 2008 до 2015 година што го вршел режимот на претходната власт предводена од Никола Груевски, преку УБК и Петтата управа во МВР.

Експремиерот Костов, како што пренесе МИА, нема да бара оштета за незаконското прислушување на неговите телефонски броеви, ако штетата треба да ја плати државатa. Но, ако се утврди налогодавачот на ова прислушување, ќе бара оштета и ќе ја донира во хуманитарни цели.

„Лично не се чувствувам оштетен, но институцијата каде што работам можеби претрпела штета. Дел од прислушуваните разговори се однесуваат на моите разговори со директорите на банката кога сум бил надвор од државата, и кога побарале од мене гаранции за лицитација за некои градежни компани. Тој што ги прислушувал разговорите можел информациите што ги слушал да ги даде на некоја конкурентска компанија. Таквите прислушкувани разговори можеле да направат штети кај фирмата која барала гаранција од нас“, рече сведокот Костов.