Добивај вести на Viber
Норвежани пронајдоа нафта и гас на дното на Јадранското Море, во количества кои би можеле да ја направат Хрватска нова енергетска сила на Балканот.
Норвешката компанија „Спектрум“ во изминатиот период изврши 2Д скенирање на морското дно во близина на хрватскиот брег. Испитувањето траеше пет месеци и покажа големи потенцијали за наоѓалишта на нафта и гас вдолж целото хрватско крајбрежје, вели Руне Енг, директор на компанијата „Спектрум“.
„Засега е рано да се зборува за количества и вредност. Но секако, Јадранот заради својата мала длабочина ќе биде интересен за глобалните џинови во нафтената и индустријата за гас“, додаде тој.
Хрватскиот министер за економија Иван Врдољак најави дека веќе на пролет ќе објави меѓународен тендер за експлоатација на природните наоѓалишта и изрази очекување оти Хрватска наскоро „би можела да стане енергетски џин не само на Балканот, туку и во цела Европа“.
Околу 20 светски нафтени и компании за гас веќе пројавиле интерес да се јават на тендерот, а податоците кои ги собра „Спектрум“ ќе треба да помогнат во дополнителна мотивација на странските инвеститори.