Хрватски инвеститор гради фабрика за пакувана вода во Гари
Објавено во: Економија 26 Февруари, 2014
Хрватската компанија „Мали Лошињ“ гради фабрика за пакувана вода во близина на дебарското село Гари, вредна околу 6 милиони евра и која треба да донесе 70 вработувања.
Министерот за економија Ваљон Сарачини и градоначалникот на Дебар Ружди Љата денеска ја посетија локацијата каде што се гради фабриката.
„Досега работата на терен се изведува според планираната динамика. Инвестирани се околу 1,5 милиони евра, а тоа вклучува подготвителни работи, ископи, приклучок на трафостаница, како и поставување на темели за фабриката. Во моментот работат 15 работници со потребната механизација“, изјави Сарачини.
Според првичните најави, во мај годинава компанијата треба да го објави конкурсот за вработување на 35, а во септември за дополнителни 35 работници. Сарачини смета дека како резултат на оваа инвестиција многу млади луѓе од дебарскиот регион ќе можат да ја планираат својата иднина во општина Дебар.
Целокупното производство од фабриката ќе се пласира на странските пазари, со што се очекува да се подобри извозот и да се намали трговскиот дефицит.
„Нашите предвидувања се дека до есен годинава ќе заврши изградбата, кога ќе започнеме и со експлоатацијата на вода. За почеток планот е да се произведуваат од 50 до 60 милиони литри флаширана вода годишно“, најави претставникот на хрватскиот инвеститор Дражен Балиќ.