Хуманитарен концерт за 18-годишниот Боро Стајиќ

Добивај вести на Viber

Во среда на 3-ти април ќе се одржи хуманитарен концерт под мотото „Бидејќи заедно можеме повеќе“ со цел да се соберат пари за лекување на 18-годишниот Боро Стајиќ. Почетокот на концертит е закажан за во 20 часот и 30 минути во Универзалната сала во Скопје. Пред неколку месеци, поради несреќна случка, Стајиќ се здоби со тешка телесна повреда на вратниот дел од 'рбетот. Како последица од повредата на пршлените тој има целосна парализа на рацете и нозете.Неговото лекување е долготрајно и скапо. „Боро моментално се наоѓа во Словенија на лекување и терапии каде засега е задоволен и сите сме среќни бидејќи напредува. Тој е многу млад и кај него има голема желба и оптимизам за се да заврши како што сакаме и се надеваме. Сакам да ги повикам сите кои се во можност да дојдат на 3-ти април во Универзалната сала да си поминат убава вечер, а парите се наменети за лекување на Боро“, најави денеска неговата сестра  Јана Стајиќ, која им се заблагодари на сите кои помагаат за лекувањето на нејзиниот брат. Со купување влезници за концертот граѓаните ќе помогнат во лекувањето на 18-годишното момче. Цената на влезниците е 300 денари, а може да се купат на продажните места на Купи карти за се, во Универзалната сала и преку интернет. Концертот ќе се одржи во организација на Црвениот Крст на град Скопје и општинските организации на Црвениот крст на територијата на Скопје во соработка со Инфомедиа системи и Универзалната сала, а се отворени и телефонски броеви за донации.