И Косово ќе добие крак од „Јужен тек“?

Добивај вести на Viber

Србија сака да постави еден крак од гасоводот „Јужен тек" кон Косово. Ова го најави српскиот министер за природни ресурси, рударство и просторно планирање Милан Бачевиќ. „Сега го правиме просторниот план на јужниот крај на 'Јужен тек', кој ќе заврши во Македонија. Ќе поставиме и крак за Косово", рече Бачевиќ за белградска „Политика". Тој додаде дека Србија не треба да се вклучува во расправата меѓу ЕУ и Русија за изградбата на гасоводот. Почетокот на изградбата на гасоводот „Јужен тек”  во Србија симболично беше означен кон крајот на ноември 2013 година. Сепак градежните работи со полн ек ќе почнат во февруари годинава. За изградба на српскиот дел од гасоводот ќе бидат на располагање околу 500 милиони евра, кои ќе ги обезбедат Гаспром и Србијагас. На изградбата на овој транснационален гасовод кој завршува во западна Европа и кој низ Србија ќе минува во должина од 421 километар, директно ќе работат околу 25 илјади работници, а индиректно околу 100 илјади вработени од српските градежни компании, произведувачи на опрема и претпријатија од услужниот сектор.